Barcelona right-back hlui Dani Alves chuan a khelh mekna Paris Saint-Germain chu Ligue 1 title a lakpui leh takah chuan footballer piang tawh zawng zawng zingah trophy a chawi hnem ber.

Alves hian a career chhungin trophy 42 lai a chawi ta a, Egyption footballer hlui Hossam Hassan lehpelin footballer hlawhtling bera chhal a ni. Hassan hi an ram Egypt chhungah a ropui hle a, a career chhungin trophy 41 ngawt chawi mahse Alves hian a lehpel.

Barcelona player hlui dang Andres Iniesta chuan trophy 37 a chawu tawh a, Iniesta trophy chawi tawh zat hi Barca player hlui bawk Maxwell leh Egyptian player hlui dang Ibrahim Hassan nen a inang chiah bawk.

Alves hian kum 2001 khan Bahia atangin professional football a khel tan a, Bahia-a a awmlai hian Copa do Nordeste vawi hnih a chawi hman. Bahia atang hian Spain lamah insawnin Sevilla a zawm leh a, Sevilla a awm atanga kum thum chhung erawh trophy chawi an nei lo thung.

Kum 2006 khan UEFA Cup-ah Sevilla hi an champion a, a kum lehah an humhim zui bawka, trophy dang pawh Sevilla hian Alves-a awm laiin an chawi nual. Kum 2008 khan Barcelona zawmin, Catalan club hi a hlawhtlinna ber a ni chho va, hemi hnu hian Juventus leh PSG lamah kalin kum tin trophy pakhat aia tam a chawi leh ziah bawk.

A ram Brazil tan trophy pakhat aia tam chhawiin, kum 35 mi hi footballer hlawhtling ber a tih loh theih lova, a la chawi belh lovang tih pawh a sawi theih loh. Alves-a trophy chawi tawh dan:

x23 Barcelona

x5 Sevilla

x5 PSG

x4 Brazil

x3 Bahia

x2 Juventus