Football player te chuan jersey number chi hrang hrang an ha thin a, team pakhatah number inang an awm ngai lo a. Player tam zawk chu an jersey number atangin an khelhna position a rin thiam theih thin a ni.
A tlangpuiin tlema jersey number hniam deuh chu defender te chanpual a ni thin a, 7, 9 leh 10 te chu team khata thiam zual deuh hlek, playmaker, attacking midfielder leh forward chhuanvawr deuh chanpuala ngaih deuh an ni thin.
Tun hnuah chuan number an inpek dan pawh tlem tlemin a inthlak danglam ve hret hret a, hetih rual hian tun hma atanga an lo kalpui tawh thin chu a la awm ve reng bawk a. Tun tumah hian No. 1 atanga No. 11 thleng kan sawi fiah dawn a ni.
No. 1
A tlangpuiin No. 1 hi chu first-choice goalkeeper chanpual a ni thin a, goalkeeper ni lo, position danga khelte hian he number hi chu an ha ngai lo tluk a ni. Real Madrid leh Spain goalkeeper hlui Iker Casillas khan a larpui hle a, Germany goalkeeper hlui Oliver Kahn leh Italy goalkeeper hlui Gianluigi Buffon te pawhin an larpui hle.
No. 2
He number hi chu a tlangpuiin defender chanpual a ni a, right-back zingah he number chang hi an tam deuh ber a tih theih a. Gary Neville chuan Old Trafford-ah khan he number hi a ha deuh ber thin a, Cafu leh Ivan Cordoba te pawh khan he number hi an ha ve chawt bawk a ni.
No. 3
Defender chanpual tho niin, he number hi chu left-back lampangin an ha nasa ve thung a. Ashley Cole, Paolo Maldini leh Roberto Carlos te khan he number hi an lo larpui thin a ni.
No. 4
Central defender te leh defensive midfielder zingah he number ha hi an lo awm teuh tawh a. Real Madrid captain Sergio Ramos te, Arsenal legend Patrick Vieira te chu he number larpuitu langsar zual an ni.
No. 5
He number pawh hi centre-back te chanpual a ni deuh ber a, Barcelona captain hlui Carles Puyol bakah Fabio Cannavaro leh Franz Beckenbauer te khan he number hi an ha deuh char char a ni.
No. 6
Hei pawh hi centre-back te chanpual a la ni deuh a, Bobby Moore khan a ha nasa a, left-back lar Roberto Carlos khan he number hi a chang ve bawk thin a. Barcelona midfielder Xavi khan he number hi a ha deuh ber a, tun hnuah hian defensive midfielder zingah he number chang hi an awm nawk a ni.
No. 7
Winger leh second striker zingah he number hi a lar hle a, central striker zingah pawh ha an awm ve zeuh bawk a. Sir Alex Ferguson khan Manchester United-ah khan Cristiano Ronaldo chu he number hi a chantir a, a hmaa an player lar Eric Cantona leh David Beckham te hnung a zui a ni.
Cristiano Ronaldo leh he number hi chu a inkawp fuh laklawh tawh hle a, Real Madrid leh Juventus ah pawh a hak chhunzawm zel a, a hming lemah pawh CR7 an ti hial a. Liverpool legend Kenny Dalglish bakah Luis Figo leh George Best te khan an ha nasa viau bawk a ni.
No. 8
He number hi chu chuti taka sawi lar hluai a ni ve hran lo a, chutih rual chuan midfielder goal thun thei ve tak hian an ha thei hle a. A khat mawi tawka goal thun ve thei, mi goal thun tur siamsak thinte chanpual a tih theih.
English attacking midfielder ropui ber pawla sawi, Liverpool captain hlui Steven Gerrard kha he number tilartu langsar tak a ni a. Chelsea attacking midfielder tha thin Frank Lampard pawh kha he number tilartu zingah a sawi tel theih bawk a. Andres Iniesta leh Kaka te pawhin he number hi an lo ha ve thin a ni.
No. 9
He jersey number hi chu team khata centre forward tha ber emaw, striker tha ber emaw an haktir thin a. Eng formation pawh hmang se, team zinga goal thun thei ber chanpualah an dah deuh ber thin.
Liverpool striker hlui Fernando Torres khan a ha lar hle a, Barcelona striker Luis Suarez bakah Karim Benzema leh Robert Lewandowski te chu he number larpuitute an ni hlawm.
No. 10
A tlangpuiin No. 10 hi chu team pakhata playmaker emaw, attacking midfielder chhuanvawr emaw chanpualah an dah fo thin a. He number hi chu a phur nazawng an haktir ngai lo hle a, player te chuan he number hi a hlawhin an hlawh chhuah a ngai ti hialin a sawi theih awm e.
He number lo ha tawh thin lar tak tak sawi tur an tam hle a, Pele, Johann Cruyff, Dennis Bergkamp, Eden Hazard leh Lionel Messi te hming atang ringawt pawh hian thil awmzia chu a chiang thei ang.
No. 11
He number hi chu left winger hian an ha nasa viau mai a, he number larpui bertu zingah chuan Manchester United legend Ryan Giggs a sawi lan loh theih loh a. Chelsea striker hlui Didier Drogba khan a ha thin a, Barcelona striker hlui Neymar pawh khan a ha ve thin a ni.