Tun season atana AC Milan-in an game hnuhnung ber an khelh zawhah, Milan striker Zlatan Ibrahimovic chuan inkhelh a chawlhsan thu a puang a, kum 41 mi hian mittui nen football a mangtha.

Hemi hma hian Milan hian Zlatan hi contract thar an ziahpui loh tur thu leh a, season zawh ruala an club a chhuahsan tur thu an puang tawh a, Zlatan hian dawrtu nei mah se, inkhelh chawlhsan turin thu a ti tlu ta zawk a ni.

Sunday zanlai khan Milan hian tun season-a an game hnuhnung ber an khel a, Serie A inkhelah Verona lo mikhualin, 3-1  in Milan hi an chak a, Rafael Leao chuan goal hnih a thun bakah, Olivier Giroud chuan penalty spot atangin goal a thun bawk.

An inkhelh zawhah Zlatan chuan San Siro-a Milan supporter te hmaah, “Football ka mangtha a, mahse nangni erawh ka mangtha lo che u,” tiin a sawi.

Swedish footballer hian kum 1999 khan a professional career bul a tan a, kum 24 vel zet professional football a nih chhungin, trophy 34 ngawt a chawi a, mahse club football-a trophy ngaihhlut ber UEFA Champions League erawh a chawi thei ta lo.

Zlatan hian a club career-ah game 988 khelin, goal 573 a khung a, assist vawi 216 nei bawkin, Ballon d’Or dawng thei turin vawi 11 nominate a ni. A ram Sweden tan game 122 khelin, goal 62 a khung bawk a, Sweden tana goal khung hnem ber a ni.

Zlatan hi club hrang hrangah a khel kual hnem hle a, ram hrang hrang khel kualin league title ringawt pawh vawi 14 a chawi. Swedish club Malmo FF-ah kum 1999 khan a professional career bul tanin, kum 2001 khan Ajax a pan a, Ajax-ah hian kum thum chhungin league title pathum a chawi.

Kum 2004 khan Juventus-in an lalut a, Juventus-ah hian Serie A title pahnih chawi mah se, hei erawh Juventus in buaina an tawh avangin Juventus title hi hlihsak an ni a, mahse Zlatan hian Inter Milan a pan zui a, Inter-ah hian Serie A title pathum a chawi belh ta tho a ni.

Kum 2009 khan Barcelona-in an lalut ve leh a, Barcelona-a season khat chiah awm mah se La Liga a chawi a, loan-in AC Milan panin, kum 2011 khan Milan hian a nghetin an lalut chhunzawm. Milan hi Serie A title a chawipui leh a, mahse an champion hnu hian Paris Saint-Germain in an lei chhuak. PSG tan hian Ligue 1 ah game 122 khelin goal 113 a khung a, Ligue 1 title vawi li a chawi bawk.

Kum 2016 khan Manchester United in an lalut a, United-a season hnih a awm chhungin League Cup leh Europa League te a chawi a, hemi hnu hian Major League Soccer club LA Galaxy ah lutin, California-a season hnih a awm hnuah, AC Milan-a kirin, AC Milan hi Serie A-ah a champion pui leh a, a hun tawp a hmanna club a ni zui ta bawk a ni.