Football club zawmna hun tha min pe lo: Usain Bolt

06th August 2020, 10:08PM

Usain Bolt chuan football club zawm a tum lai khan a thiam zia lantirna hun tha pek a nih loh thu a sawi chhuak.

Jamaican sprinter ropui Usain Bolt chuan intlansiak lam a chawlhsan hnuah infiamna huanga a tuina dang pakhata inhman zui a tum a. Bolt hian football club eng emaw ber zawm dan kawng a dap a, a hnuah erawh a beidawng a, infiamna khawvel chu a chawlhsan zui a ni.

Bolt hi Australia ram lamah a kal a, A-League club ah te trial a nei a. 2018 kumah khan vawi 8 ngawt Olympic champion lo ni tawh hian Central Coast Mariners zawm theih dan kawng a dap a, an hnenah hian trial a nei a, an mit a tlung zo ta lo thung.

A naupan lai atang tawhin Usain Bolt hian football player nih a chak tawh a. A-League club Central Coast Mariners-ah hian pre-season friendly match an khelh tumin an khelhtir ve a, goal hnih a thun a, hei hian lawm leh sawi zui a hlawh phian a ni.

Ireland striker hlui Andy Keogh chuan Usain Bolt inkhel chungchang a sawi zui a, a ball khawih dan vel chu a dik lo hle nia sawiin, ball a dawng nghet lo a, a per kual nasa thei viau niin a sawi bawk a. Hetiang hi an lo hmuh dan a nih avangin Central Coast Mariners chuan contract an ziahpui ta lo a ni.

100m leh 200m world record siamtu Bolt chuan, “Football club zawm ka tum lai vel khan duh angin hun tha min pe lo niin ka ngai a. Khatiang lai vel khan ka duh anga thain ka khel lo fo a, chutih rualin kha aia hun tha kha min pe ngat se ka ziaawm viau turah ka ngai,” a ti.

“Duhthusam ang diak diakin thil hi a thleng thei thin lo a nih tih a chiang hle a, kan duh anga thil a inher chhuah loh vangin zinkawng tihtawp ve mai erawh a tha lo a, kawng dang zawh zui mai hi a finthlak mai a ni,” a ti bawk.

A sawi zelnaah, “Ka beisei ang leh ka tum angin thil a awm thei ta lo a, chutih rualin khatianga hun ka lo hmang ve te kha a pawina ka hre hran lo a, ka inchhir phah lem lo,” a ti.

Usain Bolt hian a hmain Germany, South Africa leh Norway lamah pawh club thenkhat a lo hrawn hman bawk a. Football khela eizawn chak viau mah se a duhthusam ang chu a thleng thei ta lo a ni.

Copyright © inkhel.com 2024. All rights reserved.