Manchester United chu Premier League club zingah chuan ngaihven hlawh ber an nih thu an puang.

Tun hnaiah khan Footy.com chuan Google hmanga club hrang hrang an zawn dan atangin Manchester United chu Premier League club zingah chuan hriat hlawh ber an nih thu an puang a. He mi chungchang hi kum 10 chhung zet an zir chiang niin an sawi a, Red Devils aia ngaihven hlawh hi an awm lo niin an sawi.

Football club lar leh ngaihven hlawh an thlan chhuah dawn hian mi tam tak chuan TV rating te, social media lama follower ngah dan te leh an club bungraw hralh chhuah tam dan te chu tehfungah an hmang thin a. Footy.com erawh chuan kalphung dang daih an hmang a, internet kal tlanga ngaihven hlawh zual hi an thlang a ni.

Footy.com hian Google kal tlanga khawvela pumpuia Premier League club hrang hrang an zawn dan chu an zir chiang a. Kum 10 chhunga miin football club an zawn dan chu atangin tehfung an siam a, Manchester United tluka zawn nasat hi an awm lo a, point 14,453 an hmu.

Chelsea chu pahnihnaah an awm a, anni hian point 13,280 an hmu a, Premier League champion Liverpool chu pathumnaah an awm a, anni hian point 11,833 an hmu a. Palinaah Arsenal an awm a, anni hian point 11015 an hmu a ni.

Arsenal hnuai chiahah hian Manchester City an awm a, anni hian point 7684 an hmu a, point 5056 hmutu Tottenham Hotspur chu parukna an ni a. Everton chuan point 2211 an hmu a, pasarihna an ni.

Leicester City chuan point 1807 an hmu a, pariatnaah an awm a, an hnuai chiahah hian point 1671 hmuin Aston Villa an awm bawk a. Point 1656 hmutu West Ham United chu Top 10 huangah an awm pha chiah a ni.

Newcastle United, Wolverhampton Wanderers, Crystal Palace, Southampton, Burnley, Norwich City, Watford, Brighton, Bournemouth leh Sheffield United te chu Top 10 huang pawnah hian an awm hlawm a ni.