Back pass rule felfai tak a awm hian football a ti hmuhnawm hle. Tupawhin kan hria anga, player ten an mahni goalkeeper an tum reng vanga an ke hmanga an pass a nih chuan goalkeeper tan chu ball chu man a thiang lo.

Back pass dan hi Fifa chuan kum 1992 daih tawh khan a lo siam tawha, he danin a tum ber chu hun ti hek zawnga player te an chet loh nan niin, hma hruai zawk team ten defensive game ringawt an khelh loh nan siam a ni bawk.

Back pass rule a awm hma chuan team pakhat zawkin goal an thun a nih chuan mahni lamah ball chana hun paih char char an duh mai thin a, lehlam pawl ten an chuh buai hman hmain goalkeeper an man tir leh mai thin.

Hma hruai zawk team tan chuan back pass ball man theih chu chakna hnar tha tak a ni ringawta, amaherawhchu inkhel ti hmuhnawm loh tu lian tak a ni tlat thung. Tichuan le, football a thuneihna sang ber neitu Fifa chuan dan thar, back pass rule, an tih chu kum 1992 khan a siam ta a, chu dan chu vawiin ni thlenga hman a ni ta a ni. Back pass rule (dan) hnuaiah chuan mahni pawlte ball pass goalkeeper in a man thei lova, throw-in atanga ball lo kal (tawktu an awm loh chuan) a man thei loh bakah ball a man hnu leia a dahin a man nawn leh thiang tawh lo bawk.

Back pass rule bawhchhia engtin nge an hrem?
Goalkeeper in a pawlpa pass a man a nih chuan ball a man na hmun atang chiah khan indirect-freekick a chawi tur a ni. Tum reng vanga pass a nih leh nih loh referee in a hre chiang hle tur a ni thung. Inkhel thenkhatah chuan defender ten ball an chuhna lamah anmahni keeper lam hawi zawng ten back pass ni miah lovin ball an tlawh per ve theia, keeper tan man rema a awm si a nih chuan a man ve thei reng tho a ni. Heng kan sawi zawng zawngte hi ke hmanga pass tihna zel a ni.

Trick hai a thiang lo
Ke hmanga back pass a nih chuan man theih loh a ni a, amaherawhchu lu emaw khup emaw awm emaw, tum reng vanga back pass pawh nise, goalkeeper tan man theih a ni reng thung. Hetianga tih theih a nih avang hian player thenkhat ball thiam deuh tan trick hai theih a ni ve tlat a. Defender pakhatin leia ball a khalh laiin back pass duh ta se, a pass chu goalkeeper tan man theih a ni lo hrim hrim a, man theiha siam a duh avangin ball chu lei atangin a khup emaw lu emaw awm emaw a back pass siama goalkeeper man tir a tum avanga a la/pir kang a nih chuan dan a bawhchhe tho tho a ni.

Chu ball chu goalkeeper in a tawk emaw tawk lo emaw pawh nise a thiltih lai la la khan back pass rule bawhchhe nghal panga ngaih a ni a, a pass tanna hmunah khan indirect-freekick player khan a chawi nghal bawk tur a ni.

(adsbygoogle = window.adsbygoogle || []).push({});