Season hman liam takah Chelsea an che tha thawkhata, league title hial la in season an khar a nih kha. An hlawhtlinna hmu reng chungin "boring" tia sawisel an ni a, Mourinho chuan football chu "philosophy" lam a ni lova, chak a pawimawh ber tiin a sawi.

Chelsea boss Jose Mourinho hian an elpui manager te a sawi chhan ni berin a langa, manager dangte chu chak aia lan mawi tum lutuka ngaiin an thiltih chu atthlak a tih thu a sawi bawk. Chelsea hian season liamta title an lak theihna kawngah khan beautiful football chu an khel lo chianga, football a pawimawh ber hnehna chanah erawh tuma phak rual an ni lo.

Wenger leh Van Gaal te hian a bikin ball chang tam chunga hnehna chang duh an nihzia an naute an khelh tir dan atangin hmuh theih a ni a, Mourinho erawh a ni lo thung. April thlaa Man Utd 1-0 a an hneh tum khan an mualah ngei Mourinho naute hian ball possession 30% chauh an nei a nih kha. Kha inkhelah khan defender Zouma chu midfielder anga chhawr a ni nghe nghe.

League Cup leh Premier League nomawi chawi chunga season khar ta Mourinho chuan manager thenkhatin counter-attack mamawh lo ang ten an insawia, possessive game tha tak khelh chhuah an tum thin. Counter-attack pawh manager in hman tangkai a tum loh chuan manager a tak a ni. Counter-attack hi khingpui te tuk zal nana hmanraw tha tak a ni tiin a sawi.

Football hi a danglam ngai dawn lova, football ah chuan chak tluka pawimawh a awm lova, chak a pawimawh ber a ni tawp mai tiin Blues boss chuan a sawi chhunzawm bawk. Chelsea hi season hman liam takah khan vawi thum chiah an tlawma, point riat laiin an fal bawk.