07 Dec 2019 03:28

inkhel

Floyd Mayweather leh Dana White te’n inremna an tifel

Dana White leh Floyd Mayweather te chuan kum thar tawp lam atan thawh dunna tur thuthlung an tifel niin an sawi.

Boxing legend Floyd Mayweather chuan chawlh puang tawh mah se thla hmasaah khan 2020 kumah chuan a kir leh tur thu a lo sawi tawh a. Tun hnaiah khan Los Angeles khawpuia Staples Center-ah UFC president Dana White nen an inhmu a, hetah hian tawngkain inremna thuthlung hi an siam niin an sawi a ni.

UFC boss Dana White chuan Floyd Mayweather nen hian hma an lak dunna tur chungchang an sawi dun niin a sawi a, kum thar tawp lamah event ropui tak buatsaih an tum thu sawiin, hemi ti tur hian inremna pawh an tifel vek tawh niin a sawi chhuak.

White chuan, “Los Angeles Clippers inkhel ennaah Floyd nen hian kan thu dun a. Eng eng emaw kan sawi dun phawt a, a hnuah chuan kan titi a inman chho viau a, court sirah chuan inremna thuthlung kan sawi fel zui der mai a ni,” a ti.

“Floyd nen kan beisei anga thil a kal tluang zel a nih chuan kum thar March thla velah khian Al Haymon nen dawhkan kilin thuthlung fumfe tak chu a ziah ngeiin kan ziak thei tawh ang,” a ti bawk.

A sawi zelnaah, “Thil eng emaw nuam tak kan tih theih hmel a, kan ruahman anga thil a awm chho thei zel a nih chuan kum thar October thla emaw, November thla emaw velah chuan Floyd nen hian thil eng emaw tak chu kan ti dun thei ngei ang,” a ti.

2017 kumah khan anni pahnih hi an lo phusa dun tawh a, hemi tumah hian UFC star Conor McGregor chu boxing ring chhungah a lut a, Floyd Mayweather nen hian an inhnek a ni.

Conor McGregor nen an inhnek hi Mayweather chuan professional boxing a khelh hnuhnun ber a ni a, inhnek a chawlhsan hian 50-0 record a nei thei a ni.