10 Jun 2020 04:51

inkhel

Floyd Mayweather-a’n ropui ber niin a inchhal

Floyd Mayweather chuan boxer awm tawh zawng zawnga ropui ber niin a inchhal a, Muhammad Ali chu panganaah a dah a ni.

Kum 43-a upa Floyd Mayweather hian professional boxing khawvelah hneh loh a nei miah lo a, 2017 kumah khan Conor McGregor a hneh a, vawi 50 a chak thei chiah a, record a siam chiang hle.

Mayweather hian tun hnaia ESPN in an kawmnaah boxer ropui ber a nih thu hi a sawi a, Muhammad Ali, Rocky Marciano leh Joe Louis te aiin a indah chungnung zawk a ni.

“Boxer dang zawng zawng aiin world champion ka hneh hnem tawh bakah hun pawh ka duh rei lo zawk a, mi dangte angin fight pawh ka mamawh hnem ve lo bawk a ni,” tiin Mayweather chuan a sawi.

“Ka hmaa ding tawh chu ka hnek fuh hnem ber a, min hnek let tam lo ber bawk a. Kum 18 chhungin weight division hrang hrang pangaah world champion ka ni thei a, kei aia boxer ropui hi an awm lo a ni,” a ti bawk.

Muhammad Ali chungchang sawiin, “Ali hi boxer tha ve tak chu a ni a, chutih rualin weight division khatah chauh a tel a, Ken Norton kha vawi thum ngawt a hneh lo bawk a, boxer ropui ber a ni thei lo hrim hrim,” a ti.

“A hun lai khan African-American te chu an mi leh sate tan an ding chhuak ngai lo a, Ali kha a ding chhuak ve thin a, kha vang khan a lansarh phah a ni mai a, boxer ropui dan indawtah chuan panganaa awm tur chauh a ni,” a ti bawk.

A sawi zelnaah, “Boxer tha leh tha lo hi eng atangin nge kan teh dawn? Eng emaw thil bik avanga hma lakna lampang chu tehfung pawimawh ber a nih dawn chauhin Muhammad Ali hi ropui ber a ni thei ang,” a ti.

“Chutiang ni loin, boxer tha leh ropui chu record siam hnem lamah te, mi kuttum dawng hnem ve lo tih lampanga teh tur a nih chuan Floyd Mayweather aia ropui hi an awm thei lo,” tiin a sawi a ni.

Mayweather chuan, “Muhammad Ali chuan tun dinhmuna ka din theihna kawng hi min sialsak a, legend chu a ni chiang mai a. Record siam kawngah chuan Ali hi a chuti vak lo a, world title pawh fight vawi 7 chauh nei lakah a hloh tlat a ni,” a ti.