29 Jul 2019 05:53

inkhel

Floyd hian Manny a hnek ngam tawh lo: Freddie Roach

Boxing trainer lar Freddie Roach chuan Floyd Mayweather chu Manny Pacquiao nen inhnek that leh ngam tawh lo niin a sawi.

Manny Pacquiao leh Keith Thurman te WBA welterweight title inchuha an inhnek kha Floyd Mayweather chuan a hmunah a en a. Kum 40-a upa Pacman a chak hnuah khan thawm eng eng emaw a awm zui a, 2015 a lo inhnek tawh Floyd leh Manny te inhnek nawn leh chungchang a ri zui nasa hle.

Hun rei tak chhung Pacquiao training lo pe tawh Freddie Roach chuan kum 42-a upa Floyd Mayweather chu a tawng chhuak duh miah lo nia sawiin, Las Vegas khawpuia hnehsawh taka a khingpui Keith Thurman a hneh hnuah phei chuan Mayweather chu a ngawichawi lehzual niin a sawi bawk.

Freddie Roach chuan, “Floyd Mayweather hian Manny Pacquiao nen inhnek nawn leh hi a ngam chiah tawh lo niin a lang a. Hemi chungchang hi chu a tlanchhiatsan deuh zel a ni ber mai,” a ti.

“Inhnek leh chungchangah engmah a sawi chhuak duh lo a, a ngawi tlat ringawt a. Manny leh Keith Thurman te inhnek zawha result an puan lai pawhin a awm lo a, a hmaa a lo tih thin angin result puan hnuah tu mah pawh a ko kual lo a ni,” a ti bawk.

A sawi zelnaah, “Ka rin danin Manny kha a che tha si a, Floyd khan a hlau ta viau a nih hmel a. Rematch hi sum chungchang vang ni loin Pacman a hlauh vangin Mayweather hian a zuam tawh lo a ni ber mai,” a ti.

Floyd Mayweather chuan Filipino legend Manny Pacquiao chu 2015 a an inhnek tuma a chak loh vang khan chhuanlam eng eng emaw zawng kual chawp niin a lo puh tawh a. Roach leh Pacman te chuan an inhnek hma khan a inhliam thu sawiin, a hliam chu sawi lang duh loin Mayweather kha a hmachhawn ta tho niin an sawi.

Roach chuan Pacman chu a hma zawng aia tha leh hlauhawm a nih tawh thu a sawi a, tunah chuan a kut pahnih chu duhtawkin a hmang thei tawh bawk a, Mayweather nen chuan inhnek leh theih ngei a duh hle niin a sawi chhuak.

“Pacquiao khan Mayweather a hneh lo kha zahthlak a ti hle a, kha aia tha khan a che thei tih a hre reng a ni. An inhnek hma khan a inhliam a, heti chung hian inhnek kha thulh a duh chuang lo a ni,” tiin a sawi.

“Tunah chuan nasa takin hma a sawn belh a, a hma zawng aiin a tha lehzual tawh a tih theih a. A kut pawh a na tawh lo a, a pahnihin duhtawkin a hmang thei tawh a, tun hi inhnek nawn leh nan chuan hun tha tak a ni a. Manny hnenah pawh Mayweather nen an inhnek leh thei a nih ngat chuan duhthusam a ni ang a, a hneh ang a, boxing chu a chawlhsan theih tawh tur thu ka hrilh a ni,” a ti.