27 May 2019 05:10

inkhel

Floyd hian Conor hi a la sawp leh duh reng: Ellerbe

Floyd Mayweather chuan Conor McGregor chu phur takin a la hmachhawn leh duh niin boxer ropui team member pakhat chuan a sawi.

Mayweather Promotions CEO Leonard Ellerbe chuan tun hnaia Irish fighter in Floyd a cho fo mai chu a chhang let a, Floyd chuan engtik hunah pawh Conor chu sawp leh hrep a inpeih niin a sawi chhuak.

2017 ah khan Conor McGregor leh Floyd Mayweather te chu boxing ring chhungah an inhmachhawn a, infiamna hrang hlak pahnih belhbawm inhmachhawn tawhah chuan pawisa luh hnemna ber a la ni.

Kha inhnekah khan round 10-naah Floyd Mayweather chu a chak zawk a, a tawpah an pahnih hian sum tam tham tak an dawng ve ve bawk a. Hemi tuma an inhnek vang hian $375 million zet chu an insem thei niin an sawi a ni.

Leonard Ellerbe chuan, “Conor McGregor, Dana White leh mi dangte hi an zahawm hle a. Conor hian ring chhunga inhnek leh a duh tak tak a nih chuan eng te nge tih tur chu a hre vek tawh,” a ti.

MMA champion hlui hian tun hnaiah Floyd hming hi a sawi ri fo mai a, inhnek leh a duh thu hi a sawi chhuak thin a. Hemi chungchang hi chhangin Ellerbe chuan, “Dana White a biak phawt a ngai a, Conor McGregor hi Floyd Mayweather nen an lo inhnek tawh a, a chak lo zawkah a tang nghe nghe a ni,” a ti a.

“A hma pawha chak lo zawk khan inhnek leh a la duh cheu a nih chuan phone lek chhuak se, biak tur pawh a hre chiang vek tawh a. Thil harsa engmah a awm lo. Anni pahnih hi inhnek leh ta se a tawp dan tur pawh ka ring lawk thiam khawp mai. Floyd hian a hma aia chiang zawkin Conor hi a sawp ngei ngei ang,” a ti bawk.

McGregor chuan, “Boxing dan hnuaia Floyd nen inbeih leh hi ka chak khawp mai a. Inhnek leh ngat ila chuan ka chak tawh hi ka ring viau a ni,” a ti.