Conor McGregor chuan Floyd Mayweather nen an inhnek leh thei a nih ngat chuan hneh dan tur a ngaihtuah chhuah tur thu a sawi.

UFC star Conor McGregor leh boxer ropui Floyd Mayweather te chu 2017 kumah khan boxing ring chhungah an inhmachhawn a. Las Vegas khawpuia T-Mobile Arena ah khatih laia kum 39-a upa Mayweather chuan round 10-naah kum 29-a upa McGregor chu TKO in a hneh a ni.

An inhnek atanga kum thum hnuah Irish fighter McGregor chuan boxing lampangah nasa takin hma a sawn belh tawh niin a sawi a, inhnek a chawlhsan hmaa 50-0 record neitu American boxer Mayweather nen inhnek leh ta se, a hneh theih tawh tur thu a sawi chhuak.

Mike Tyson chuan Conor McGregor chu a fak hle a, Floyd Mayweather nen an inhnek tuma round 10 a thlenpui thei kha mak a tih thu a sawi chhuak a. Hetianga Mike Tyson a tawng chhuah hnuah hian McGregor chu a pawr thar ve leh hle a ni.

McGregor chuan, “Mike, ka lawm e. Tunah chuan Floyd-a thuruk tam tak ka hre tawh a, rematch kan nei leh thei a nih ngat chuan a dan a dang tawh viau ang,” a ti a.

“Boxing coach hnuaiah ka inzir nasa tawh a, Floyd-a style pawh ka man chiang tawh hlein ka hria a, hneh theih dan tur hi ka ngaihtuah chhuak ang a, Floyd hi ka hneh tawh ngei ang,” a ti bawk.

A sawi zelnaah, “Iron Mike hmel kan hmu chho leh thei ta hi a lawmawm ka ti a, ka sawi tawh angin Floyd Mayweather nen kan inhnek leh a nih vaih chuan ka hneh ngei ngei tawh dawn tih hi ka tiam ngam,” a ti.