Manny Pacquiao chuan Floyd Mayweather cho chhuah beiseiin kumin chhungin Amir Khan nena inhnek a duh thu a sawi.

Pacman hian Kuala Lumpur khawpuiah Lucas Matthysse chu a knock out a, world title 11-na a la a. Boxing khawvela a rawn inlar leh tak hnuah hian Pacquiao chuan Mayweather nena inhnek leh a chak thu a sawi a. Hemi tipuitling tur chuan a hma thei ang bera Amir Khan hmachhawn a duh thu a sawi a, Amir Khan hi a hneh phawt chuan Floyd Mayweather chu a koh chhuah theih a ring a ni.

British boxer Amir Khan pawhin Manny Pacquiao hmachhawn hi a chakna a rei tawh a, a vanglai chanchin tiropuitu tur a nih a beisei a. Hetiang a nih rual hian promoter lampang chuan an tuipui lutuk rih lo.

Pacquiao promoter Bob Arum chuan WBA welterweight champion hi Terence Crawford emaw, Vasyl Lomachenko nen emaw inhnek leh se a duh a. Eddie Hearn pawhin Amir Khan chu Kell Brook nen inhnek turin a lo duh ve bawk a. Mahse, boxer pahnihte’n an duh ve ve a nih a, promoter te’n an bawhzui duh a nih chuan Pacman leh Amir Khan te hi inhnek thei dinhmunah an ding tho a ni.

Crawford emaw, Lomachenko emaw a hmachhawn a nih chuan Pacman hian Mayweather nen an intawn leh theihna hun chu a bawhpelh thei dawn a ni tih a hre chiang a. Hetiang deuh bawk hian Amir Khan pawhin Brook nen an inhnek a, a chak lo a nih phei chuan a duhthusam anga Pacman hmachhawn theihna hun a nei tawh dawn lo tih a hre bawk a, an rilru a inkar kual ve hle.

Floyd Mayweather nen inhnek nawn leh a duh a nih chuan Pacquiao hian December thla khian Amir Khan nen inhnek a dil a ngai dawn a. December thlaa kum 40 tling tur Pacman chuan a taksa a enkawl that thu leh a la insawizawi that thu sawiin, Amir Khan nen an inhnek a nih chuan chak tura beiseiawm zawk a la nih thu a sawi a ni.