Manny Pacquiao chuan Floyd Mayweather nen inhnek leh theih a duh thu a sawi nasa hle a, a thil duh hi tihpuitlin a nih dawn loh chuan boxing chawlhsan mai a duh niin a trainer chuan a sawi.

Thla hmasa khan Manny Pacquiao hi Adrien Broner nen an inhnek a, he inhnekah hian Pacman chu chakin WBA welterweight title chu a humhim a. A chak hnu hian 2015 a an inhnek tuma a hneh tak loh Floyd Mayweather hnek leh theih a duh thu a sawi chhuak leh a, a duhthusam hi a thleng thei dawn lo a nih chuan chawlh zui mai a duh tawh a ni.

Pacman hi Keith Thurman nen inhmachhawn leh thei tur an ni a, hetih lai hian a trainer Freddie Roach chuan Floyd Mayweather nen an inhmachhawn dawn te a nih loh chuan Pacquiao hian inhnek chhunzawm zel a duh tawh lo niin a sawi a ni.

Freddie Roach chuan, “Floyd Mayweather nen an inhnek leh thei dawn a nih ngawt loh chuan a dang hmachhawn hi a duh tawh hran lo a. A duhthusam hi a thleng thei dawn lo a nih chuan Manny hian boxing chawlhsan mai a rilruk a ni,” a ti.

“Manny nen hian hemi chungchang hi kan sawi dun tawh a, a duh ber chu a hmaa a lo hneh loh tawh Mayweather nen fair taka inhnek nawn leh hi a ni a. A duh ang hi thuneitute’n an tipuitling thei dawn lo a nih chuan inhnek zui zel hi a tum tawh loh thu a sawi a ni,” a ti bawk.

Pacquiao leh Mayweather te inhnek kha khawvela boxing match awm tawh zawng zawnga sum luh hnemna ber a la ni a, pay-per-view leh ticket man atang ringawtin £470 million zet chu a lut a ni.

Floyd Mayweather chuan Andre Berto a hneh hnuah 2015 khan boxing a chawlhsan a. Chawlh a puan hnu hian vawi hnih chu a inlan leh tawh a, 2017 khan UFC star Conor McGregor nen an inhnek a, hetah hian Floyd hi a chak a. Tun hnaiah Japanese kickboxer Tenshin Nasukawa nen an inhmachhawn leh a, Floyd hi a chak leh bawk a ni.