Conor McGregor chu 2018 chhunga infiammi fit zual an thlan chhuah zingah pakuana a ni a, mi tam tak chuan Khabib Nurmagomedov nen an inhmachhawn tuma a fit loh dan ngaihtuahin hetiang a thleng thei hi pawm harsa an ti hle.

Octagon chhunga a luh hnuhnun ber tuma Khabib nen an inbeih khan Conor kha a hah hma hle a. 2016 a Eddie Alvarez a hneh hnuah Conor hi MMA khawvelah a inlan tlem hle a, August 26, 2017 khan Floyd Mayweather nen boxing ring lamah an inhmachhawn leh daih a, hei bak a din chhuah leh chu Khabib nen an inbeih kha a ni.

Mi tam tak chuan Floyd Mayweather a hneh loh chhan bulpui pawh kha duhthusama a fit loh vang nia an ngaih thu an sawi a. UFC 196 a Nate Diaz nen an inbeih tum pawh khan Conor McGregor chu a hah hma hle mai a, duh ang takin a fit tawk lo a ni tih a chiang hle.

Khabib Nurmagomedov nen an inhmachhawn leh a, khami tumah pawh khan Conor chu a chau hma zawkah a tang leh a, a hnuah a tlawm zui ta nghe nghe a. A hun kal tawh ngaihtuahin mi tam tak chuan Conor hi infiammi fit zual thlan chhuah zinga tel pha turah an ngaih loh thu an sawi chhuah phah a ni.

American sports magazine Sports Illustrated in infiammi fit zual list an buatsaihah hian pro-boxer Canelo Alvarez, pro-baskeball player Russell Westbrook, pro-football player Luka Modric, triathlete Patrick Lange leh vawi hnih ngawt Olympic gold medalist rower lo ni tawh Hamish Bond te an tel a ni.

Sawiselna thawm a rik nasat deuh takah chuan Sports Illustrated chuan Conor McGregor chungchang chu an sawi fiah a, MMA leh boxing velah te a tel kawp theih avanga pakuana nihtir an nih thu an sawi a. A sawiseltu lampang chuan he list-a lang thei tur chuan lar tak nih a ngai nia an ngaih thu an sawi a ni.