First half chauh khel ta se

30th October 2019, 01:10AM

Tun season chhunga Premier League game khelh tawhte hi half time thleng chauh khelh ni ta vek se club hrang hrangte dinhmun chu a danglam thei viau dawn a ni.

Premier League game te hi half time thleng chauh khelh ni a hlawm se tuna hmahruaitu Liverpool chu a chungnung berah an la awm tho ang a, anmahni bakah hian Manchester United pawh a chung berah hian an awm tel ve thei ang.

An khelh tawh chinah first half chhungin Manchester United chuan goal 8 an thun tawh a, anmahni lamah goal 2 chiah an la chhuah bawk a. Tun thlenga game 10 an khelh tawhah point 22 lai an hmu thei tawh ang a, a chung berah hian an awm thei dawn a ni.

A tak ramah erawh Manchester United chu an chungnung lo chiang hle a, vawi 10 khelh tawhah vawi 3 an chak a, vawi 4 chu an khelhpuite nen an inhnehtawk a, vawi 3 an tlawm tawh bawk a. Heng inkhelhah te hian goal 13 an thun tawh a, anmahni lamah goal 10 an chhuah tawh bawk a, point 13 hmu tawhin, hmahruaitu Liverpool nen point 15 in an inthlau mek a ni.

Manchester United hian Wolverhampton Wanderers, Southampton leh Arsenal lakah te first half chhungin hma an hruai zet a, a hnuah 1-1 in an inhnehtawk leh hlawm a. Ole Gunnar Solskjaer chu a inkhelh ve thin laiin a tawp thlenga tan mar pat duh miin a kaihruai thin a, a kaihhruaina hnuaiah erawh a tawp thleng an tang thei lo fo a ni.

Liverpool chuan point 22 hmuin hmahruaitu dinhmun hi an hauh thei dawn a, Manchester United nen an point hmuh hi a inang chiah dawn a. Manchester City chu pathumnaah an tla thla ang a, Aston Villa chu palinaah an awm thei dawn a, Chelsea chu panganaah an awm ang.

Tottenham chu paruknaah an awm thei ang a, an hnuaiah hian Leicester, Everton, West Ham United leh Brighton te chu an awm thei dawn bawk a, Southampton chu a mawng berah an awm thei ang.

Copyright © inkhel.com 2024. All rights reserved.