Post danga tarlan tawh angin Copa Libertadores final second leh El Monumental stadium-a khelh tura ruahman chu Madrid-ah sawn a ni a, Argentine club inhal pahnih Boca Juniors leh River Plate-te chuan Real Madrid khelmual Santiago Bernabeu-ah Copa Libertadores final second leg an khel dawn.

Second leg khel tura kal Boca player-te chuanna bus chu River Plate supporter ruh zualin an beih chiam avangin final second leg hi sawn hlat a nih mai bakah, a khelhna hmun tur pawh hi mel 6,000 laia sawn hlat a nih phah.

Manchester United leh Manchester City striker hlui tuna Boca Juniors tana khel mek Carlos Tevez chuan Madrid khawpuia final second leg an khel daih tur chu a mak a tih thu a sawi. Tevez chuan, “Final mak tak a ni a, Boca leh River-te intum tur Madrid-a khelh daih hi a dangdai hle. Mahse player kan nihna angin kan game khelh turah ngun taka rilru kan pek a ngai a ni,” a ti.

Copa Libertadores hi South America-ah chuan club football trophy hlu ber a ni a, Argentine club ropui pahnih Boca Juniors leh River Plate-te intum leh tur chu mi tam takin South American club football chanchina match ropui ber turah hial an dah. Team hnihte hi Boca khelmualah first leg an khel tawh a, 2-2 in an inhnehtawka, Santiago Bernabeu-ah an chingfel dawn a ni.

Beih an nih hian Boca player-te an inhliam nuala, Tevez ngei pawh hi damdawiinah kalpui a ni. Boca lam chu beih an nih avang hian an vui hle a, Copa Libertadores trophy chu second leg khel lova hlan mai nih phut viau mahse South America-a football thuneitu sangber CONMEBOL chu a remti lo thunga, Europe-ah second leg chu a nghat ta a ni.