Arsenal goalkeeper hlui David Seaman chuan Europa League final-a Arsenal-in Chelsea an hmachhawn hunah Arsenal chuan an goalkeeper Petr Cech khelh tir lo se a tih thu a sawi.

Kum 37 mi Cech hi Chelsea player hlui a ni a, kum 10 chuang zet Chelsea si ban a nghah hnuah Arsenal hi a pan chauh. Tun season khan Cech hi Premier League lamah a khel tawh meuh lova, Arsenal manager Unai Emery chuan Premier League lamah Bernd Leno hmang mahse Europa League-ah Czech goalkeeper Cech hi a hmang thung.

Cech hian tun season zawh rualin inkhelh a chawlhsan tur thu a lo puang tawh a, Europa League final hi a khel a nih chuan a career-a a game hnuhnung ber a ni dawn. Cech hian inkhelh a chawlhdan dawn avangin Chelsea chuan thla thar hian an goalkeeper hlui hi an sporting director thar atan an lalut dawn bawk niin Sky Sports chuan a lo tarlang tawh bawk.

Arsenal tana kum 13 zet si ban lo veng tawh Seaman chuan, “Ka sawi duh ber chu Arsenal hian Europa League title lak hi an mamawh em em tih hi a ni a, Chelsea aiin an mamawhna a sang zawk. Season thara Champions League an khelh theih nan an champion ngei ngei a ngai a, keichuan team tha ber khelh tir hi ka duh ber a ni.

“Arsenal hian an team tha ber an khelh tir dawn a nih chuan Cech aiah Leno an hman a ngai a, mahse Cech hian a khel dawn chiang; a chhan chu a game hnuhnung ber tur a ni,” tiin Sky Sports a hrilh.