15 May 2019 05:25

inkhel

Final-a kan tlawm chuan rilru a na rei dawn: Son

Son Heung-min chuan a vawi khatna atan UEFA Champions League final an luh hmasak berah an tlawm nghal a nih chuan hun rei tak chu rilru na taka an awm a rin thu a sawi.

Tottenham striker Son Heung-min chuan June 1 a Madrid khawpuia hmabak an neih chu a hautak dawn hle tih sawiin, tun season chhungin Premier League-a vawi hnih an lo hneh loh tawh lakah theihtawp chhuah an tum hle tih a sawi chhuak.

South Korea forward chuan, “Champions League final kan khelh huna chak tur emaw, chak lo tur emaw vel chu ka sawi duh lo a. He game pawimawh tak atan hian inpuahchahna hun kan la nei ngah a, tha taka khel thei tura inbuatsaih a pawimawh ber,” a ti.

“Kan champion thei a nih ngat chuan a ropuiin a lawmawm dawn hle a, chuti a nih loh a, a tlawm zawka kan tang a nih ngat chuan kan rilru na hi hun rei tak chhung chu a dam hauh lo ang,” a ti bawk.

A sawi zelnaah, “Madrid khawpuia kan inkhelh hunah chuan inpeih hman veh vawh kan duh a, eng thil nge lo thleng dawn tih chu a tak ram kan thlen hunah a chiang vek dawn a. Liverpool hi team tha em em mai an ni a, hei vang tak hian kan khelh dan chu a pawimawh viau ang,” a ti.

Kum 26-a upa Son chuan kar thum vel zet chawlh hahdamna hun a neih avangin Atletico Madrid khelmual Wanda Metropolitano stadium-ah chuan duh ang takin a khelh theih a inrin thu a sawi a ni.

Tun season chhunga Premier League game hnuhnung berah Tottenham chuan Pathianni khan Everton an hmachhawn a, 2-2 in an inhnehtawk a, palina an nih phah a. Season tharah UEFA Champions League khel thei turin an tling a, a vawi khatna atan Europe khawmualpui inelna sang berah final khel turin an inpuahchah tan a ni.

Nikum November thla atang khan Son hian Spurs tan goal 18 chu a thun a, mahse an game hnuhnung pangaah goal a thun thei lo thung.

Son chuan, “Mi zawng zawng hian chawlh hahdam an mamawh vek a, tunah pawh final khelh hmabak kan ni a, a fit thei ang ber nih kan tum dawn a. Final kan khelh hunah chuan kan theihna zawng zawng kan sawm khawm vek dawn a ni,” a ti.