30 Jan 2019 05:30

inkhel

Fighter of the Year-ah Oleksandr Usyk an thlang

Oleksandr Usyk chu Boxing Writers Association of America chuan 2018 Sugar Ray Robinson Fighter of the Year atan an thlang.

Ukraine boxer Oleksandr Usyk (16-0, 12 KOs) hi cruiserweight world champion niin, ESPN leh Ring magazine te pawhin Fighter of the Year atan an lo thlang tawh bawk a. Ukrainian boxer zinga he chawimawina dawng thei pahnihna niin, a hma chiah 2017 khan Vasiliy Lomachenko chuan he chawimawina hi a lo dawng tawh a. Anni pahnih hi thian inkawmngeih tak niin, 2012 Olympic ah pawh khan an tel dun a ni.

Kum 32-a upa Usyk hi nikum July thla khan mi pariat telna World Boxing Super Series ah a champion a, belt pathum kawlin, hetiang ti thei palina a nih bakah cruiserweight division atanga hetiang puitlin thei hmasa ber hi a ni a. 2018 khan a khingpui pathumte chu anmahni khuaah vek a hneh thei a, WBSS semi final-ah Mairis Briedis chu Latvia ah a hneh a, Murat Gassiev chu Russia rama final an khelhah a hneh a, England ramah a belt pali kawl humhimin Tony Bellew chu a hneh bawk a ni.

Boxing Writers Association of America chuan chawimawina dawng tur hi vote hmangin an thlang a, vote tla zawng zawng atanga 83% zet mai chu Usyk hian a hui a. He chawimawina dawng thei tur hian Usyk chuan unified lightweight world champion Vasiliy Lomachenko, junior welterweight world champion Maurice Hooker, lightweight champion Mikey Garcia leh welterweight champion Terence Crawford te chu a khum a ni.

Oleksandr Usyk-a trainer Anatoly Lomanchenko (Vasiliy Lomachenko pa) chuan a zawnin Eddie Futch-John F.X. Condon Trainer of the Year chawimawina a dawng a, 2017 ah pawh a lo dawng tawh a. Hemi dawng tur hian Jay Deas, Robert Garcia leh Derrick James te a khum a ni.

Usyk-a manager Egis Klimas chuan Keith Connolly, Chepo Reynoso leh Sam Katkovski te chu khumin Cus D’Amato Manager of the Year chawimawina a dawng a, he chawimawina hi a zawnin kum thum a dawng ta chiah a ni.

Team Usyk hian chawimawina lian pathum hi an hui vek a, hetiang hian a zawnin kum hnih chu an ti thei ta a ni.

Muhammad Ali-Joe Frazier Fight of the Year chawimawina chu nikum April thlaa inhnek turu deuh mai, split decision hmanga Jarrett Hurd chak tum kha an thlang a, hetah hian Jarrett Hurd chuan Erislandy Lara a hneh a. He inhnek hi ESPN Fight of the Year atan an lo thlang tawh bawk a ni.

Sam Taub Broadcast Award chu Showtime Sports president Stephen Espinoza chuan a dawng a. Lineal heavyweight champion Tyson Fury chuan Bill Crawford-John McCain Award for Courage in Overcoming Adversity a dawng a, hemi dawng tur hian Senator John McCain, Main Events promoter Kathy Duva, trainer Jose Santa Cruz leh Showtime broadcaster Brian Custer te chu a khum a ni.

International Hall of Fame broadcaster Jim Lampley chu Barney Nagler Long and Meritorious Service Award an hlan a. Heng bakah hian chawimawina dang dawngtute pawh an puang nual a, heng chawimawina te hi 94th Annual BWAA Awards hunpuiah an sem dawn a ni.