25 Sep 2018 05:52

bakteaJr.

Mizo tlangval

​FIFPro XI-in dem a hlawh

The Best FIFA Awards 2018 sem zawh a ni a, award hrang hrang zingah FIFA World Eleven / FIFPro XI thlan a ni a, player thenkhat-te chu phu lo riauva ngaitu an tam a, FIFPro hian a dem a hlawh hle.

FIFPro XI-ah hian goalkeeper atan thlan Manchester United leh Spain goalkeeper David De Gea thlan a ni a, season liamta khan Premier League-ah De Gea hian clean sheet 18 a nei a, Premier League Golden Glove award a dawng. De Gea hi keeper tha a nihzia kan hre vek a, mahse World Cup-ah erawh Spain tan a che ropui lo hle a, World Cup chhung zawngin game li khelin save pakhat chiah a nei. 

FIFPro XI-a De Gea telh a ni hi duh lotu an tam em em a, Manchester United tan che tha thawkhat viau mahse World Cup-ah eng a ni lo. Chu mai ni lovin, season liamta Premier League a clean sheet 15 nei thei Thibaut Courtois chuan World Cup-ah a ram Belgium semi-final thenpuiin, Golden Glove a dawng bawk a, FIFA Best Goalkeeper award hlan a ni bawk, Heti chung hian Courtois hi FIFPro XI-a telh a ni lo hi hriatthiam a har hle.

Defence lamah right back-ah Dani Alves dah a ni bawk a, Alves hian FIFPro XI a telh ni turin season liamta khan Champions League-ah PSG a chet that pui lem lova, Ligue 1 lamah erawh treble an la thung. Inhliamin a tlakbuak avangin Alves hian World Cup a khel thei lo bawk a, mi tam tak chuan Alves chu FIFPro-ah telh a ni hi hraitthiam harsa an ti.

Thil mak tak anga lang leh pakhat chu FIFPro XI-a Mohamed Salah tello hi a ni. Liverpool tan mimal anga a chet that zia kan hre theuh va, goal a thun thei hle a, Liverpool chu Champions League final hial a thlenpui bawk. Season liamta khan Premier League top scorer niin, Everton laka a goal chuan Puskas Award a dawng nghe nghe. UEFA leh FIFA Best Player ni thei turin top 3-ah thlan tlin a ni ve ve a, mahse Salah tan FIFPro XI-ah hmun a awm chuang lo.

FIFPro XI 2018 :

David De Gea (Manchester United / Spain)

Dani Alves (PSG/ Brazil)

Raphael Varane (Real Madrid / France)

Sergio Ramos (Real Madrid / Spain)

Marcelo ( Real Madrid / Brazil)

N’Golo Kante (Chelsea/ France)

Eden Hazard (Chelsea / Belgium)

Luka Modric (Real Madrid/ Croatia)

Kylian Mbappe (PSG/ France)

Lionel Messi (Barcelona/ Argentina)

Cristiano Ronaldo (Juventus / Portugal)