19 Oct 2019 02:24

digimalt

​FIFA vs PES

Video game-a Football Game ngaina tan chuan bung thar kan kai leh ta a. FIFA20 leh PES2020 chu September thla khan tlangzarh a ni ve ve a, tunah hian gamer ten an khel chho leh ta laih laih mai.

Konami siam eFootball Pro Evolution Soccer nge nuam EA siam FIFA? Tih hi inhnialna a tam hle a, i'n khaikhin ve dawn teh ang. Chutih laiin chipchiar tak erawh chuan kan khaikhin hman dawn lo.

Naupan tet ata game khel thin ka ni a, tun tumah hian keima ngaihdan ka rawn sawi dawn, ka ngaihdan ang hi in ngaihdan a ni vek kher dawn lo tih erawh hre hmasa chungin in chhiar dawn nia. Chutih laiin mahni game ngainat em em tan avanga game dang sawisel chi erawh ka ni lo, ka ngainat em em mah nise ka duh loh lai chu ka sawisel thin tho a, chuvang chuan lai takin ka rawn khaikhin ange.

FIFA game hi 98 atang khan ka la khel deuh vek ang, ka ngaina em em a, ka khel hnem bawk a. Chutih laiin duh khawp lohna ka nei teuh thin. Ka duhthu a sam lohna ni ziah thin chu graphics hi a ni. Khawvel puma lar zawng leh kheltu tam zawngah chuan PES hian FIFA a tluk lo nasa tih chu tu pawhin kan hria ang. Chutih laiin Graphics-ah erawh FIFA hian PES a tluk hleithei lo ka ti thin. FIFA-in Frostbite engine an rawn hman atang erawh kha chuan hma an sawn nasa hle a, ka lawm hle nghe nghe bawk. Chutih laiin PES erawh an tluk thei lo a ni graphics lamah chuan.

PES leh FIFA hi ka khel ve ve a, chutih laiin FIFA hi 80% ka khel anga, PES erawh 20% emaw vel chiah ka khel ang. Gameplay-ah chuan FIFA ka ngaina zawk a, a chhan chu kan lo khelh than a nih avangin kan bel hneh tawh a, PES ai chuan khelh nuam ka ti fe. Hetih lai hian PES gameplay pawh ka sawisel chuang lo. Skills move mawi tak tak a tam a, thiam takin khel thei ilang chuan FIFA game aia khelh a nawm lohna tur ka hre bik lo.

EA erawh an vannei hle, license an nei kim ti ila kan sawi sual lovang. Man Blue, London FC, Hampshire Red , North East London , etc. tihte ai chuan an club hming ngeia khelh theih FIFA chu ka tlang zawk fo thin. Hei tak hi a nia EA Game FIFA pawh khawvel mipuiin an hlutna chhan chu.

PES2020-ah erawh Europe club lian 5; Barcelona, Manchester United, Bayern Munich, Juventus leh Arsenal te chu Konami partner an ni a, club lian an thawhpui avang hian fans engemaw zat an hip ngei a rinawm. Player Ratings-ah erawh FIFA ka dah sang nalh, awmang lo deuh awm zauh thin mahse a pumpuia thlirin a dik thawkhat hle ka ti thin.

FIFA leh PES awlsam taka ka khaikhin dan ni thin chu, graphics-ah PES a chungnung, player-te hmel pawh a nga zawk bawk. Gameplay-ah erawh ka khelh than zawk FIFA ka thlang a, PES gameplay pawh tha ka ti hle bawk.

- digimalt