May ni 29, 2015 khan Zurich-ah FIFA President thlan a ni a, Sepp Blatter chu hneh taka thlan tlin leh a nih ta, heti hian a zawnin term 5-na a chelh dawn ta a ni.

Inthlan hma ni hnih lek awmin FIFA mi pawimawh 7 Zurich-ah man an ni a, eirua inpuhna thubuai hrang hrangin a chiah piah nuai karah inthlanna kaltlangpui a ni ta thova.

Mr Blatter-a khingtu awmchhun hi Price Ali a ni a, vote chhiar vawi khat an neih naah Blatter chuan vote 133 lai hmuin, Prince Ali chuan vote 73 a hmu a. First Round-a hnehna chang turin vote 140 chu Blatter hian hmu tling lo mahse Blatter chuan vote chhiar zawhah vote hmun thuma thena hmun hnih a hmu ngei dawn tih a hriat avangin Prince Ali chu a inhnukdawk ta a ni.

UEFA leh America lam chuan Blatter vote loh an tum zia inthlan hmain an puang nasa. Heti chung hian Blatter chu an la khing thla thei chuang lo. Hei hi a chhan ni bera lang chu Blatter hi Africa khawmualpui lamah leh Asia lamah a tla na hle a, Europe leh Western lam khuan an buk thla thei lo ni berin a lang.

Blatter hi kum 79 lai a ni tawh a, 2011 khan term 4-na chelh tura thlan tlin a nih hma khan chawlhsan a lo tum tawh a nih kha. Mahse 2011 khan a chuh leh a, tunah term 5-na atan thlan tlin a ni leh ta a, a term hi 2019-a a hman zawh meuh chuan kum 83 a tling der tawh dawn a ni.

Blatter chuan a vawi 5-na atana thlan tlin a ni leh ta chu a lawm zia sawiin, theih tawpa FIFA kalpui a tum thu a sawi chhunzawm bawk a. "Tumah dik famkim kan awm lo. Kei pawh ka dik famkim lo, hetih lai hian theih tawpa kan thawh ho chuan hna tha tak kan thawk thei dawn a ni." tiin a sawi. Blatter hian tun term a chelh zawh hi chuan a chawlh tak tak tawh dawn thu sawiin,"Tun term ka hman zawh hunah chuan FIFA hi ka chawlhsan tawh dawn a ni," tiin.

Blatter tlin nachhan ber hi Africa leh Asia ten an vote vang kan ti lo thei lo. Hei hian term 5 chhung teh meuh mai president nihna a chelh tir thei a. Eirukna thubuai vel vangin a kaihhruai FIFA mualpho mek mahse Africa leh Asia te chuan Blatter an la duh tlat. Hei hi a chhan ber chu Europe leh Western ramte khuan Africa leh Asia an ngaihthah mai ang tih hlauvin Blatter hian theih tawpin sum leh pai leh hmasawna hrang hrang hmangin Asia leh Africa te a vulh a. World Cup thlen dan chungchangah pawh Asia leh Africa ten an thlen theih nana hma la nasa ber pakhat a nih bawk avangin a tling leh ta nge nge a ni.