Franck Ribery chuan FIFA 20 siamtu EA Sports hnenah an graphic vel a sawisel a, a hmel lan dan velah a lungawi loh thu a sawi.

Bayern Munich winger hlui Franck Ribery hian Fiorentina-ah a khel mek a, FIFA 20 chu a fate nen an khel a, ama lem a en chian chuan a lung a awi ta chiah lo a, ang a inti lo hle.

Ribery chuan, “Ka fate nen tun hnaiah FIFA 20 kan khel a, ka lung a awi chiah lo hle a. EA Sports, tu nge he pa hi?” tiin Twitter lamah a lawm lohna hi a lantir a ni.

Hetiang boruak karah hian EA Sports elpui ber PES chuan boruak an siam vat a, rang takin kum 36-a upa Ribery hnenah an graphic chu a that zawk daih thu an lo sawi chhuak nghal a ni.

PES 2020 chuan tun season chhungin Serie A official licence an nei a, Juventus club-ah exclusive rights an nei bawk a. Konami chuan Juventus lakah thuneihna an neih tak avangin FIFA 20 ah pawh Juventus hi an awm ve lo a, Piemonte Calcio tih hming an put phah a ni.

Serie A lama Ribery a kal hnuah a che chhe hran lo viau a, French winger hian Fiorentina tan tun season chhungin game 7 khelhah goal 2 chu a thun tawh bakah mi goal thun tur vawi khat a siamsak tawh bawk a ni.