September ni 29-a tihchhuah tur EA Sports siam FIFA 18 chuan player ranking a tichhuak kim ta a, a tahtawl te tein top 100 an puang, tunah chuan Top 10 kan hre kim thei ta. FIFA game rating hi khawvel football-in a ngaihven a, chipchiar leh uluk taka rating hi pek a nih thin avangin a dik thawkhat thin hle, hei vang hian game mai mai tia ngaihven loh chi hi a ni lo hrim hrim.

FIFA 18 Rankings Top 10

10. GONZALO HIGUAÍN

Juventus hmatawng hi rating 90 pek a ni a, tlemin han thau deuh thin mahse goal khung a thulh chuang lo. Shooting-ah 87 lai a hmu a, a ke dinglam leh veilam a hmangthiam ve ve, dribbling-ah pawh 83 pek a ni nghe nghe.

9. TONI KROOS

Real Madrid-in League leh Champions League an double-naa player tangkai ber pakhat, Madrid midfield innghahna Toni Kroos hian passing-ah 88 a hmu a, a shooting pawh a chhe lo, 83 pek a ni bawk. Overall rating-ah 90 a hmu a ni.

8. EDEN HAZARD

English Premier League mai ni lo, khawvel football-a player hmuhnawm bik an sawi apianga tunlaia sawi hmaih theih miah loh chu Eden Hazard hi a ni, ball a thiamin a khal thei em em a, dribbling-ah 92 lai pek a ni a, overall-ah 90 pek a ni.

7. SERGIO RAMOS

Player tharum ngah tak a ni, Real Madrid tlar hnung ban nghet a ni a, physical rating 83 pek a ni hi a phu hle nghe nghe a ni. Ball kangah a tha em em a, ball clear lamah a thawhhlawk em em laiin goal khung lamah pawh a thun thei phian bawk a, rating 90 hmuh hi a phu hle a ni.

6. ROBERT LEWANDOWSKI

Bayern Munich tan ropui takin a khelh bakah ram tan goal a khung reng bawk. Forward skills 88 pek a nih bakah physical-ah 82 pek a ni bawk. Ball a thiam em em bawk avangin 86 lai pek a nih avangin 91 rating pek a ni ta a ni.

5. MANUEL NEUER

Goalkeeper tha tak a ni tih khawvelin a hai lo, Diving-ah 91 pek a ni a, kicking-ah phei chuan 95 lai pek a ni. Goal ven lamah chuan goalkeeper tha dangte nen an inang tlang maithei, mahse a danglamna bik chu last defender ang hiala khel thei khawpa ball pet thiam a nih avangin dinhmun sang takah chu chu a vawrh a, 92 rating pek a ni.

4. LUIS SUÁREZ

Goal khung thei leh tharum ngah tak a ni. Barcelona hmatawng Suarez hian shooting-ah 90 a hlawhchhuak a, ball khalh lamah erawh Neymar, Messi leh Ronaldo te a phak lo a ni deuh mai a, chu chuan a pawt hniam hret, Suarez hi rating 92 pek a ni.

3. NEYMAR

Khawvela footballer man to ber Neymar hi Messi leh Ronaldo te nen thenkhat chuan huang khatah an dah tawh, ball a thiam em em a, dribbling-ah 94 lai a hlawhchhuak, hetih lai hian physical lamah tlemin a hnufum deuh a, chu chuan a pawthniam mai niin a lang, rating 92 pek a ni.

2. LIONEL MESSI

Messi hi dribbling-ah 95 pek a ni a, ani aia pek san an awm lo. Shooting-ah 90 pek niin physical leh defending lamah Ronaldo a phak lo deuh chauhva, chuvang chuan 93 rating pek a ni ta a ni.

1. CRISTIANO RONALDO

Ballon d'Or winner ni lai leh Champions League nomawi Real Madrid hlawhchhuahpuitu Ronaldo hi FIFA 18 cover-ah hman a ni a, ball khalh lamah Messi tluk lo deuh mahse defending leh physical-ah a chungnung zawk a, Messi aiin pace a nei hnem hret bawk, that falna a nei lo, a tha vel vek a ni zawk, hei vang hian rating-ah a chungnun phah ta a, ani aia rating pek san an awm lova, 94 pek a ni ta a ni.

Top 100-11