Kum dangah chuan EA Sports-in FIFA cover-ah player tha tak tak an chuan tir thin a, kum dang ang bawkin Messi chu FIFA 16 main cover-ah a chuang leh dawn. Ram hran hranah FIFA cover-a chuang tur hi player thlan an ni thin a, kum dangah chuan EA Sports hian tha an tih an chuan tir thin, nikum khan Europe lamah chuan Eden Hazard chuantir a nih ngei kha.

Kuminah erawh an tih dan an thlak ta a, EA Sports hian UK ram chhunga hralh tur FIFA 16 cover-a chuang tur bik hi mipui duh thlannaah an nghat a, Sergio Aguero, Jordan Henderson, Thibaut Courtois leh Harry Kane te zinga mipui duh ber leh vote hmu hnem ber chu FIFA 16 UK Cover-ah a chuang dawn a ni.

Kum dangah Rooney, Giggs, David Beckham leh Ronaldinho te an lo lang tawh thin a, hetia vote thlak tura an chhawp chhuah zinga Liverpool midfielder Henderson tel ve ringawt pawh hi FIFA gamer te chuan an helh hle. Liverpool hian khawvel pumah fans an ngah hle a, Henderson pawh hi FIFA 16 cover-ah a chuang thut thei chiang mai.

Social Networking Facebook leh twitter-ah te FIFA 16 cover-a Henderson a chuan ai chuan lei loh mai tum zawk an tam hle mai. FIFA gamer te chuan cover-ah hian player tha ber ber te chuang se an duh a, hetih laia Liverpool midfielder lo lang ve nawlh hi an helh hle a ni.