​FIFA 16-ah hmeichhia an tel ve tawh dawn

29th May 2015, 06:05AM

Electronic Arts-in FIFA Football video game a siam thinah a vawi khat nan mipa chauh ni lo, hmeichhe footballer te pawh telh an ni ve tawh dawn. He video game thuthar hian Football khawvel a fan chhuak nghal a, game mai a ni e kan lo ti pawh a ni maithei, mahse hmeichhe football-in nasa taka hma a sawn zia tilang chiang tu a nih avangin khawvelin an ngaihven a ni.

EA chuan ningani khan Press Release neiin, FIFA 16 edition atang chuan hmeichhe football telh a nih tawh tur thu an tarlang a. Hetah hian Female International team 12 telh an ni phawt anga, chung zinga 11 te chu thla leha World Cup finals-ah an inlan dawn nghe nghe a, a thlengtu Canada, England, Brazil, Germany leh Spain te chu FIFA 16 game-ah an tel dawn chiang a ni.

EA tan hetianga model thar neih hi thil buaithlak tak a ni a, an rama zin kuala, an hmel leh an len zawng uluk taka khawl hmanga scanned vek an ni a. National team first XI leh Reserve team thlengin an hmel uluk takin an la hlaw, Heng zingah hian World player of the year Nadine Kessler, USA all-time leading scorer Abby Wambach leh England skipper Steph Houghton te hmel chu a ang hle dawn nghe nghe a ni.

Wambach phei hi chu hmeichhe chet dan khawl hmanga lak luhnan ber hman a ni a. EA Sports Headquater Vancouver-ah Wamchach hian FIFA 16 tan hna a thawk lauh lauh, ani rual hian USA-a a team-mates Sydney Leroux, Alex Morgan leh Megan Rapinoe te pawhin he hna hi an thawk bawk a ni.

FIFA 16 hi hmeichhe football telhna hmasa ber erawh a ni lo. 2000 kum khan UK Studio Silicon Dreas chuan hmeichhe football game hi a lo siam tawh a, mahse hei erawh a tla na lo hle. EA Sports FIFA series vice-president leh general manager David Rutter chuan FIFA 16-ah chuan technical lamah nasa takin hma an sawn dawn thu a sawi nghal a.

"Hmeichhia leh mipa danglam taka an lan dan tur nasa takin kan buaipui a. Kan zin kual a, an hmel te kan lak bakah motion capture hmangin thla te kan la. FIFA 16-a danglamna awm tur chu player kan model te hi a ruh mihring ruhrel ang takin kan siam vek a, hei hian khel chet dan leh dar chet dan nasa takin a tih an phah dawn.

"Hmeichhe lamah, a tam zawk sam sei an ni a, hei hian hna hautak tak min pe a ni. Tin, hmeichhiaah hian rate sang tak tak pek an awm ve hlawm a. Heng erawh mipa nen an inang dawn lova. Hmeichhe ratings 80 leh mipa ratings 80 kha an danglam dawn a ni. Mipa team leh Hmeichhe team kan intum tir dawn lo. Hei hi game in a phal loh a nih avangin an intum dawn lo a ni." tiin a sawi.

Rutter chuan Hmeichhe Ultimate team chungchang sawiin,"Club tam tak heng Man City te pawhin hmeichhe team tha tak an nei a, mahse tun dinhmunah chuan International teams 12 chiah kan ti phawt dawn. Hei hian Ultimate team erawh a chawm zo dawn lo chiang hle a, mahse club hrang hrangin hmeichhe league khel tir erawh kan la tlin lo a ni ber e. " tiin a sawi. Hetih lai hian Rutter chuan hmeichhe football lama hma an sawn zel dawn thu erawh a sawi tel a ni.

Copyright © inkhel.com 2024. All rights reserved.