12 Nov 2018 05:33

inkhel

FIA in Max Verstappen thiamloh an chantir

Pathianni khan Formula 1 Brazilian Grand Prix an tlan a, Lewis Hamilton chu pakhatna niin, Mercedes chuan constructors’ title an la a. Max Verstappen chu intlansiak zawha Esteban Ocon laka a chet dan mawi lo vangin an hrem phah a ni.

Sao Paolo khawpuia intlansiakah hian lap 44-naah hmahruaitu Max Verstappen chuan a hnung lama tlan muang Esteban Ocon chu lehpelh a tum a. Kawi hnihnaa Verstappen-a’n Ocon lehpelh a tum hian Ocon chuan a lo kian mai bik lo a, hetia an tlan lai hian an car chu a intai a, hei vang hian kawng sir lamah chuan an chhuah phah ve ve a.

Interlagos-ah hian Max Verstappen chuan hma a hruai theih loh phah a, Red Bull driver hi Lewis Hamilton chuan a rawn lehpelh theih phah a, a tawp thlengin hma hi a hruai zui a, Mercedes team chu title a lakpui zui a ni.

Red Bull driver Verstappen chuan radio atangin French driver Ocon chu a vau zui nghal a, intlansiak zawha inbukna pindanah Verstappen hian thinrim takin Ocon chu a nem zui sawk a, hei vang hian FIA chu an inrawlh phah a ni.

FIA chuan driver pahnihte hi an ko a, an chungthu an ngaihtuah hnuah Verstappen chu tih luih thila Ocon khawihah an puh a, hei vang hian a chungah hremna an lek kawh zui a. FIA chuan Verstappen hi ni hnih chhung khawtlang tana thil tha thawk turin an ti a ni.

“Max Verstappen hi mawi lo taka a chet avangin thiamloh chantir a ni a, ni hnih chhung chu khawtlang tana tangkai eng emaw a thawh a ngai a. FIA kaihhruaina hnuaiah he thil thlen atanga thla ruk chhung ngeiin hremna hi a tipuitling tur a ni,” tiin FIA chuan thuchhuah an siamah an tarlang.

“Thuneitute chuan thil thlen dan hi an enfiah a, radio hmanga an thil sawi te a hriat theih vek a. Intlansiak zawhah Verstappen chuan inbukna pindanah Esteban Ocon chu a pan a, rei vak lo an inhnial hnuah a va pan hnai a, Ocon chu a va nem emaw, a va khawih fuh ngei a ni tih a chiang a ni,” an ti a.

“Verstappen kha intlansiak laia thil thleng vang khan a thinrim tih chu a chiang a, mahse a tawp hnua a chet dan kha a mawi lo a, a tih loh tawp tur a ti a. Verstappen thahnemngaihna chu kan hriatthiampui a, a dinhmun pawh pawi kan tihpui hle a, mahse infiammi chet loh dan tur ang taka a chet avangin hrem ngei a ngai a ni,” tiin an tarlang bawk.

Intlansiak lai hian Esteban Ocon chu chetsualnaa a inhnamhnawih avangin second 10 chhung chu an hrem ve bawk a ni.