Ferrari leh Renault te chuan Formula 1 thuneitute’n Racing Point hremna thu an chhuah chu khin let an tum.

Formula 1 thuneitute chuan Racing Point chu phalna nei loa Mercedes ho brake duct entawnah an puh a, hei vang hian point 15 an paihsak mai bakah €400,000 (£360,000) chawi turin an ti bawk a. FIA International Court of Appeal chuan an chungthu hi an ngaihtuah dawn a, a hun erawh an la sawi lo a ni.

McLaren leh Williams te chuan thuneitute thutlukna khin let hi an tum lem loh thu an sawi a, Racing Point chu thutlukna khing let thei turin hun an pe a, anni hian engtin nge thu an kalpui dawn an la puang lo a ni.

Ferrari chuan Formula 1 thuneitute thutlukna chu dik famkim lo nia an hriat thu sawiin, a aia chiang zawka thil awm dan chhui tura an duh thu an sawi a. Mi team car siam dan entawn nia an puhna chu belh chian tlak a nih leh nih loh pawh finfiah that a tul an tih thu an sawi.

Renault chuan FIA thutlukna chu a aia chiang zawka hriat theih an duh thu an sawi rualin, thuneitute chu tha taka an thawhpui zui zel tur thu an sawi a. Tun aia felfai zawk inkaihhruaina neih ngei pawh tul an tih thu sawiin, 2021 a team tel tur zawng zawngte chuan mahni thil duan chhuah bak hmang lo tura an duh thu an sawi bawk a ni.

McLaren chuan thu chhuah an siam a, thuneitute rorel dan chu tha an tih thu an tar lang a. Dan bawhchhetute chu chhui chian a, a tul dan anga hrem zel chu tha an tih thu an tar lang bawk a ni.

An thu chhuahah chuan F1 huanga inkaihhruaina dan hrang hrangte FIA in an ti chiang lehzual tur chu thil lawmawm tak a nih thu an tar lang a. World Championship neih chhunzawm zel turah team hrang hrangte chuan mahni kut chhuak chauh hmang theuh se tha an tih thu an tar lang a. Ferrari leh Renault te hma lakna chu ngaihven zui ve zel an tum thu an tar lang bawk.

He mi chungchangah hian Racing Point chuan 2019 chhungin dan huang chhungah Mercedes brake duct an hman thu an sawi a, he mi beh chhan hian 2020 car tur chu an duang tih an sawi a. Kumina an car siam chhuah hi nikuma champion car ang deuh veka siam niin thenkhat chuan an puh a, ‘pink Mercedes’ tiin a hming lem an vuahsak nghe nghe a ni.

FIA thuneitute chuan Racing Point ho 2020 car design tharah brake duct chu Mercedes ho 2019 car ang deuh chiah a nih thu an sawi a, hei vang hian nikum lama Mercedes an champion theihna car chu Racing Point hian an entawn ngei niin an puh phah ta a ni.

Brake duct hi Formula 1 car aerodynamics vela pawimawh em em mai a ni a, thuneitute chuan nikum chhung khan Racing Point hi Mercedes 2019 brake duct design hman hi an phalsak a, kuminah erawh kum hlui lam design hman nawn hi an remti ta chiah lo a, hei vanga hrem hi an nih thu an sawi a ni.