Ferrari chuan kum thar January 3 hian Michael Schumacher kum 50 tlin pualin ‘Michael 50’ exhibition an buatsaih dawn.

Italy rama Scuderia hmunpuiah ‘Michael 50’ hun hi an hmang dawn a, Ferrari chuan he hun buatsaih tur hian Keep Fighting Foundation chu an thawhpui dawn a. December 2013 a vur tawlhnaa a chetsual vangin German driver ropui hi a nunna atana hlauhawmin a awm chhoh phah a, a dinhmun avang hian amah tanpui theih nan tiin Keep Fighting Foundation hi an din a ni.

Michael Schumacher kha Ferrari driver zingah chuan la hlawhtling ber a ni a, 2000 leh 2004 inkar khan Formula One drivers title 5 ngawt mai a la zawn thei a, a pumpuiah drivers title hi 7 a la thei a ni.

January 3 hi Michael Schumacher-a piancham a ni a, kum 50 a tling dawn chiah a. Hemi denchhen hian Ferrari chuan an driver ropui ber pualin Ferrari Museum-ah exhibition buatsaih hi a tum a. He exhibition-ah hian Schumacher-a’n an team tana thil ropui tak tak a lo tih tawhte lantir theihna thil hrang hrang an pho chhuak ang.

Scuderia chuan thuchhuah siamin, “Museum pindan hrang hrangah vawi 7 ngawt mai world champion ni theiin Ferraristi tana thil ropui tak tak a lo tih tawhte lantir thei thil kan pho chhuak dawn a. Ferrari fans te thinlungah chuan kumkhuain hmun a chang reng tawh dawn a ni,” an ti a.

“He exhibition-ah hian Michael Schumacher-a’n Maranello-a GT car hmasawn zelna tura a thawh hlawkzia lantir a ni ang a. Driver ang leh consultant ang pawhin nasa takin he company hian a zar kan zo tawh a. January 3 ah chuan a piancham lawmpuina ni pahfawmin a chunga kan lawmzia hi lantir kan duh a. Prancing Horse driver hlawhtling leh ropui ber lakah hian lawmthu sawi kan ba nasa hle a ni,” an ti bawk.