Kimi Raikkonen chuan Lewis Hamilton hnenah drivers championship title la tawh mahse constructors’ championship chu Ferrari team ta tur a nih thu a sawi.

Ferrari driver Kimi Raikkonen chuan tun dinhmunah Ferrari chu Mercedes aiin la hniam daih zawk mahse tlawm mai an tum loh thu a sawi a, tun season chhunga intlansiak la awm tur thlirin title la thei dinhmuna an la din thu a sawi a ni.

Lewis Hamilton chuan driver championship title a la fel tawh a, mahse constructors’ championship title chu an la inchuh mek a. Mercedes chuan hma an hruai mek a, anmahni hnaih bertu Ferrari aiin point 55 in an sang zawk a, an dinhmun a duhawm zawk daih a. Heti chung hian Ferrari chuan awlsam taka title chu Mercedes laktir an tum lo a ni.

Finn driver Raikkonen hian 2007 khan Brazil-ah drivers’ title chu a lo la tawh a, kuminah chuan Hamilton chu title lak phu hlea a hriat thu sawiin, a teammate Sebastian Vettel tihsual leh Ferrari team tihsual zara champion anga an sawi chu Kimi hian a dik a tih loh thu a sawi.

Raikkonen chuan, “Hamilton hi a champion tawh a, point hmu hnem ber chu an champion mai tur a ni a. Engtin nge a champion theih kan tih chuan vawi hnih khat chet fuh ringawt a tawk lo tih chu thil chiang sa a ni a, title lak hi a phu ve hrim hrim a ni mai,” a ti.

“Tu emaw chet fuh loh vanga champion ngawt theih a ni lo, champion thei tur chuan chet that reng a ngai a. Lewis pawh hi season tluanin a che tha chho thei deuh reng a, hei vanga champion hi a ni a, midang zar a zo lem lo,” a ti bawk.

A sawi zelnaah, “Team hrang hrangte hi zawt chiang ila, drivers’ championship hi chu an ngaihlu vek ang tih a hriat a. Mahse, a aia ropui zawk leh team tinin kan dah san zawk chu constructors’ championship hi a ni a, hei hi Ferrari chuan kan tinzawn mek a. Vawi hnih intlansiak tur la awmah hian title hi lak theih kan tum a ni,” a ti.