Sebastian Vettel chuan tun hnaiah tihsual a nei leh thin a, a nih tur ang a nih phak loh phah fo a, heti chung hian Ferrari chhuahsan a la tum loh thu a sawi.

German driver Vettel hi world title pangana la thei dinhmunah a ding chho a, mahse a elpui ber Lewis Hamilton chu tun hnaia Formula 1 intlansiak paruk zinga pangaah pakhatna a ni a, hei vang hian world champion nih a hnaih ta hle a, Vettel tan beisei theih a awm meuh tawh lo a tih theih a ni.

Mercedes chuan harh tharna an chang emaw tih mai tur a ni a, an car chu Ferrari car aia chak lo zawk nia ngaih a nih laiin Prancing Horse chuan an um pha thei ta lo riau a. Hei bakah hian Ferrari team chuan Mercedes team aiin tihsual an ngah a, an strategy tih fuh loh vangin chak tura ngaih an nih laiin an chak lo leh thin a. Hetiang boruak karah hian Vettel chuan chhuah a tum loh thu hi a sawi chhuak.

Vettel chuan, “Ferrari hi ka chhuahsan dawn lo a. Team zinga mi pakhat ka ni a, chutiang chuan ni zel se ka duh bawk a, thil dang chu ka duh lem lo,” a ti.

“Kan hmabak hi a eng hlein ka hria a, tun hnaiah kan che fuh lo leh thin a, Mercedes tan duh thala chetna hmun kan pe a ni ber a. Heti chung hian kan team boruak chu a tha hle a, hma lam kan pan zel dawn a ni,” a ti bawk.

Ferrari driver hian an team boruak that thu sawi mahse title lak chu an tan a beiseiawm vak tawh lo tih chu a pawm ve tho a ni.

British driver Lewis Hamilton chuan Vettel ai hian point 67 ngawtin a hmu hnem tawh zawk a, tun season chhungin USA, Mexico, Brazil leh a kharna Abu Dhabi ah te an la intlansiak dawn a, point 100 hmuh tur a la awm a ni.

“A lan danah chuan beisei tur a awm tawh lo hle a, mahse theihtawp kan la chhuah zel dawn a, engmah hloh belh tur a awm chuang lo a ni,” tiin Vettel chuan a sawi.