23 Nov 2018 04:56

inkhel

Ferrari chhuahsan chu a lungchhiatthlak loh ang: Raikkonen

Kimi Raikkonen chuan Ferrari chhuahsan chu a lungchhiatthlak vak dawn loh thu sawiin, a hma pawha a lo chhuahsan tawh avangin harsatna awm lutuk lo tura a ngaih thu a sawi.

Tun karah Raikkonen chuan Ferrari car a khalh hnuhnun ber tum a tawng dawn a, Abu Dhabi hnuah chuan team dang a zawm daih tawh dawn a. Season tawp rualin Ferrari hi a chhuahsan ang a, 2019 season atangin Sauber ah a lut tawh dawn a ni.

Kum 38-a upa Raikkonen hian tum hnih chu Ferrari a luhchilh hman a, Yas Marina Circuit-a an intlansiak hunah Ferrari tana vawi 150 a intlansiakna chiah a ni dawn a, vawi 10 chu intlansiak a chak ber a ni tawh a ni.

A vawi hnihna atan Kimi chuan Ferrari a chhuahsan leh dawn a, a hma pawha a thil lo tawn tawh a nih avangin a lungchhe zawnga lak tur a awm a rin loh thu a sawi a, “A hma pawhin Ferrari hi ka lo chhuahsan tawh a, chuvangin thil thar pawh a ni tawh dawn lem lo a, harsatna engmah a awm lo turah ka ngai,” tiin a sawi.

“Ka lung a chhe hran lo a, lungchhiat chhan tur engmah a awm ka hre lo a. Ka chhuah hnuah pawh anni nen chuan thian tha tak kan la ni reng dawn tho a. Thil thar leh thil tha zawk chu kan ngaihtuah ve ve zel dawn a, he team-ah hian hun tha leh nuam tak ka hmang thei hi lawmawm ka ti a ni,” a ti bawk.

A sawi zelnaah, “Hun harsa te pawh kan paltlang ho a, hun nuam tak tak pawh kan hmangho bawk a. Eizawnna kawngah chuan engtik lai pawhin a fuh reng thei lo a, eng ang boruak pawh hmachhawn mah ila kan thawhhona a tha a, a nuam vek mai a ni,” a ti.

Kimi chuan, “An hnena ka awm laiin driver title ka la thei a, team title vawi hnih kan la bawk a, an hnena ka awm laia hlawhtlinna hmel duhawm tak ka hmu thei kha lawmawm ka ti lehzual a ni,” tiin a sawi.