2018 Formula One season hman zawh takah khan Ferrari team chu budget nei hnem ber an ni a, nikum chhung atana an budget kha $410 million zet a ni.
Formula One team 10 zingah Ferrari chu budget nei hnem ber niin, constructor championship title latu Mercedes budget aiin a tam hret a, Mercedes budget chu $400 million niin Ferrari budget tamna hi $10 million a ni.
Ferrari chuan Formula One Management (FOM) atangin $190 million an dawng a, heta $80 million hi chu 2017 a prize money niin, a bak $110 million chu team hlu tak an nih vanga bonus an dawn a ni. Sumdawnna lamah Maranello team hi FOM sum lak luh atanga 20% zet dawng thei an ni a. FOM atanga an sum lak luh hi a kum hmasa lama constructor championship vela an dinhmunin a tidanglam lem lo niin an sawi.
An team hian Ferrari licensing atangin $40 million an hmuh theih bakah technical partner te hnen atangin $20 million an hmu tling bawk a. Hun rei tak atana sponsor tura an biak fel tawh Philip Morris International atangin $100 million an lak luh bakah Shell atangin $30 million an la lut bawk a ni.
Japanese Grand Prix 2018 ah khan Ferrari leh Marlboro cigarette neitu Philip Morris te hian Mission Winnow an duan thar chu an pho chhuak a. He logo hi 90 degrees a her kual chuan Marlboro cigarette kawma milem angin a hmuh theih a ni.
An sum dinhmunin a zir bawk a, an car chu an thawm that theih phah a, an car pawh a hma kum aiin second 1.19 velin a tlan chak thei zawk a. Ferrari hian an hnuaia thawk mi 900 awm tawh bakah mi 50 an rawih belh thei bawk a, title lak ngei tum viau mahse an tum angin thil a kal ta lo thung a. Singapore-ah thil thar pho chhuak mahse an beisei a pha ta chiah lo a ni.
An thil thar duan chhuah chu beisei ang a nih loh avangin a hmaa an car awm dan angin an hmang zui leh a, chutia an tih chiah chuan Kimi Raikkonen chu Circuit of the Americas, Texas ah pakhatna a ni zui a. 2019 ah Ferrari chuan Mercedes title kawl lai chhuhsak tur chuan beihpui an thlak thar a ngai dawn a. Title an la thei a nih chuan Brackley team tih lohah V6 Turbo khawvela constructors championship title la thei hmasa ber an ni ang.