15 May 2020 09:04

bakteaJr.

Mizo tlangval

​Ferrari-ah Sainz; McLaren-ah Ricciardo

2021 Formula One season atan Ferrari chuan McLaren driver Carlos Sainz an laluta, McLaren hian Renault driver Daniel Ricciardo an lalut ve thung. Ningani khan team hnihte’n he thuthar hi an puang ve ve.

Tuna Ferrari driver hi Sebastian Vettel a ni a, ani hi kumina a contract zawh rualin Ferrari chhuahsan tura a ni a, Sainz hian F1 world champion vawi li lai lo ni tawh Vettel-a hmun ruak hi a luah dawn.

Ricciardo hian McLaren-ah Lando Norris a kawppui dawna, Sainz hian Ferrari lamah Charles Leclerc a kawppui ve thung ang.

McLaren hian kum 25 Sainz hi kum 2021 atan a contract pawh sei theihna nei mahse, a contract an titawp ta zawka, Ricciardo an lalut duh a nih chuan Sainz hi a contract atanga an chhuah zalen phawt a ngai.

Ferrari hian Sainz hi kum hnih chhung atan contract an ziahpui thu an tarlanga, Leclerc-a thachhang dawltu ang deuhin; Mercedes lama Lewis Hamilton laka Valtteri Bottas a awm ang deuhin Sainz hi Leclerc-a lakah a awm dawn niin BBC chuan a tarlang.

Ferrari hian Thawhlehni khan an German driver Vettel chuan kum tawpah an team a chhuahsan tur thu an tarlanga, Vettel hi a chawl tawh dawn nge team dang a zawm dawn tih sawi theih a la ni lo.

Kum 30 mi Ricciardo hian nikum khan Red Bull chhuahsanin McLaren hi a lo zawm teuh tawh hle a, mahse khatih hunlai khan Renault chu McLaren aia an that zawk avangin Australian driver hian Renault a thlang ta zawk.

Ti hian Renault-ah hmun pakhat a awl tihna a ni ta a, French driver Esteban Ocon-a kawppui tur hi la hriat loh mahse Vettel-a hming leh F1 world champion vawi hnih lo ni tawh Fernando Alonso-a hming te pawh lam rik an ni a, Renault hian an driver naupang te chu Ocon-a kawppui tur hian lak chhoh an tum anga sawi te pawh a awm a ni.