Season tawpah McLaren driver Fernando Alonso chuan F1 chawlhsan a tum thu a puang a, hei vang hian McLaren chuan a aiawh tur an zawng nghal a, Carlos Sainz chu thuthlung an ziahpui.
World champion vawi hnih lo ni tawh Fernando Alonso chuan Thawhlehni khan kum tawpa Formula One chawlhsan a tum thu hi a puang a, McLaren chuan a hmun ruak luah tur hi an ngaihtuah nghal a. Alonso hnampui, Spanish driver kum 23-a upa Carlos Sainz chu 2019 atanga an car khalh turin an thlang ta a ni.
Carlos Sainz hian Red Bull atangin loan in Renault a zawm mek a, hetianga McLaren nen thuthlung an ziak thei hi lawmawm a tih thu sawiin, a tetlai atanga a duhthusam chu a takin a thleng dik ta niin a sawi.
Sainz chuan, “Ka hriat theih tirh ata McLaren atchilhtu ka ni a, he infiamnaah hian team ropui berte zinga mi an ni ngar ngar a. An team driver lo ni tawh zawng zawngte hi Formula 1 miropuite an ni ka ti lo thei lo,” a ti.
A sawi zelnaah, “Fernando Alonso hi McLaren driver ropui tak takte zinga pakhat a ni a, a hmun ruak luahtu ka ni thei hi inchhuanna tham a tling a, McLaren car khalh thei tura Spanish driver hmasate hnung ka zui thei hi lawmawm ka ti hle a ni,” a ti bawk.
McLaren Racing chief executive Zak Brown chuan Sainz chu kum la naupang tak ni si, tawn hriat ngah tawh tak a nih avangin an duh niin a sawi.
Zak Brown chuan, “McLaren driver thar ni tura Carlos Sainz kan be fel thei chu lawmawm kan ti tak zet a. Hun eng emaw chen chu kan lo thlithlai tawh a, Formula 1 khawvela driver la naupang tak tak rawn chawr chhuak mekte zingah chuan hmabak duhawm ber pawl niin kan hria a, kan dah sang hle a ni,” a ti.
Hungarian Grand Prix hnuah Carlos Sainz hi drivers’ championship-ah 11-na a ni mek a, point 30 a hmu tawh a. A tlan that ber chu Singapore Grand Prix niin, 2017 khan Toro Rosso car a khalh laiin palina a ni.
Driver Carlos Sainz hian 2015 khan Formula 1 khawvel a luhchilh a, Toro Rosso zawmin intlansiak vawi 19-ah 15-na a ni a. 2016 khan Toro Rosso tan vawi 21 intlansiakah a tel a, 12-na a ni a. 2017 khan Toro Rosso leh Renault tan intlansiak 20-ah a tel a, season tawpah 9-na a ni thei a. Kuminah Renault tan intlansiak 12-ah a tel tawh a, 11-na a ni mek a ni.
McLaren hian Fernando Alonso bakah hian Belgian driver Stoffel Vandoorne an kawl mek a ni.