Manchester City manager Pep Guardiola chuan defensive midfielder pangai pakhat chiah nei mahse, midang lei belh an tum loh thu a sawi.

City hian Brazilian Fernandinho bak defensive midfielder pangai an nei lova, mahse Pep chuan tuna an player neih saah defensive midfield-a khel thei an neih nual thu sawiin, a squad neihah a lungawi tih a sawi bawk.

Pep chuan, “Player-te hi an rim em em a, ni thum dana inkhel zel ang an nih avangin player ngai hman reng theih a ni lo. Fernandinho thlaktu tur hi player dang kan nei nual a; Stones pawh a khel theia, Danilo pawh a khel thei. Chumai bakah Delph leh Zinchenko-te pawh defensive midfield-ah hian an khel thei a, Gundogan pawh a la awm.

“Kan squad hi a chhah tha a, hmun hrang hranga khel kual thei player kan nei nual. A hmain thlasik bazar hunah kan bazar ve loh tur thu ka lo sawi tawh a, tuna ka squad neihah hian ka lung a awi. Player khelh phu tak tak ten inkhelhna hmun an chan loh hian hreawm ka ti thin a, midang kan lakluh phei chuan a tha dawn lo, chuvang chuan tuna kan awm dan hi a tha a ni,” a ti.

Season tawp hmain Fernandinho hi kum 34 a tling dawn a, tun season-ah City tan Premier League game zawng zawngah bul a la tan vek. A contract-ah tun season bakah season khat dang chauh Fernandinho hian a nei tawh a, City hian thlasik bazar-ah defensive midfielder an la lo a nih pawhin, nakkum nipui hi chuan an lak ngei tawh a rinawm hle a ni.