22 Nov 2020 08:18

bakteaJr.

Mizo tlangval

​Fernandes-a penalty goal khat hmangin United an chak

Manchester United chuan Premier League inkhelah kaithar West Brom chu Old Trafford-ah an lo mikhuala, United hian si khat faiin hnehna an changa, goal lut awm chhun hi Bruno Fernandes-a’n penalty spot atanga a khung a ni. Team season-ah United hi a vawi khat nan league inkhelah home-a an chak vawi khatna a ni.

Khelh 8-ah United hian point 13 hlawhchhuak tawhin, 9-naah an chho a, West Brom hian khelh 9-ah point 3 chiah la hlawhchhuakin, 18-naah an awm mek a ni.

Manchester United 1-0 West Brom

(Fernandes 56’pen)

Player Ratings

Manchester United: De Gea 7, Wan-Bissaka 6, Lindelof 6, Maguire 6, Telles 6, Matic 3, Fred 5, Fernandes 7, Mata 4, Martial 5, Rashford 4. Subs: Cavani 6, Van de Beek 6, McTominay 6.

West Brom: Johnstone 9, Furlong 7, Ajayi 7, Bartley 7, Ivanovic 6, Townsend 7, Pereira 6, Sawyers 5, Gallagher 7, Diangana 6, Grant 5. Subs: Robson-Kanu 6, Robinson 6, Krajinovic 6.

United hi an khel tha lem lo hle a, first half-ah an khel a muangin, an hlauhawm tawk lo hle bawk. West Brom tan hian United chhulchhuak Sam Johnstone chuan si ban nghakin, kum 27 mi hi a khel tha hle.

15mins vel khelh a nihin Harry Maguire chuan midfield-ah ball changin, a velama awm Marcus Rashford chu ball a pe a, Rashford hian box pawn vel chiah atangin a chhaka awm Fernandes a pe ve leh, Fernandes hian Anthony Martial pein, Martial hian goal-ah shoot nghal mahse, Johnstone chuan a lo save tha hle.

Martial-a chance neih hnu lawk hian West Brom lamin chance an nei ve leha, Ahearne-Grant a shot chu De Gea-a’n a kut hmawrin a lo save hram.

Second half an tan chiah tihin West Brom lamin United an nawr nghala, Chelsea tanga loan-a an kawl mek Conor Gallagher chu box chhungah Fernandes-a’n a titlu a, referee-in penalty a pe. VAR lamah rei tak en dik a nih hnuah, Gallagher hi Fernandes-a’n a khawih fu chiah lo niin a langa, referee chuan a penalty pek tawh chu a sut.

Penalty sut sak an nih hnu lawkah West Brom bawk hian chance tha em em an nei leha, Pereira-a’n mual dinglam atanga box-a ball a vawrh luh chu far post lama awm Townsend chuan lo la in, goal-ah a shoot-a, De Gea chuan a ke in a lo save a, save tha tak a ni.

United hian West Brom hi nawr zui ve nghalin, box lehlamah penalty an hlawhchhuaka, Juan Mata-a’n box chhung veilam atanga ball cross a tum a, Furlong-a ban fuhin, United hian penalty an hlawhchhuak. Fernandes chuan penalty hi petin, chiang em emin Johnstone chuan a save. Johnstone hi Fernandes-a’n ball a pet hma chiahin a line atanga a zuan chhuah avangin penalty hi pet that a ni a, Fernandes bawk chuan petin, Johnstone hi dive dik leh mahse a goal a, si khat faiin United hian darkar khat khelh hma deuhin hma an hruai.

Darkar khat chuang hret khelh a nihin, West Brom hian an si phurh an sut teuh hle a, Robson-Kanu chuan midfield atanin veilamah Gallagher chu ball a pe a, Gallagher hian box bulah ball la pheiin, box pawn chiaha awm Robinson a pe, Robinson hian box pawn vel chiah atangin goal-ah ball a chhuiha, goal teuh hle in, cross bar a per dawt.

Hemi hnu lawk hian Fernandes-a pass atangin Rashford chuan hnai teah chance nei mahse, a shot chu Johnstone chuan a lo save. United hian corner hlawhchhuak zuiin, Maguire chuan chance nei zui ve leh mahse, a shot chu Johnstone bawk chuan a lo save leh. A tawp thlengin goal luh belh a awm tawh lova, United hian point 3 an hlawhchhuak ta a ni.