Kumin September ni 9-a San Marino Grand Prix neih zawh takah Italian Moto2 rider Romano Fenati chu disqualify niin, Italy Motorcycling Federation chuan intlansiak thei tawh rih lo tura hrem zui nghalin, a license an hlihsak nghal bawk.

Hetiang taka naa hrem a nih chhan hi, Fenati hian an intlansiak laiin, amah rawn lehpelh tumtu Stefano Manzi-a brake lever a hmehsak a, he tih lai hian 200kph aia chakin an tlan mek. Hemi a nih avang hian disqualify nghal a ni a, a team Marinelli Snipers pawhin a contract an tihtawp sak nghal.

Marinelli Snipers-in a contract an tihtawp hnu lawk hian Fenati chuan motorcycling atanga a chawlh thu a puang chhunzawm a, FMI lam pawhin suspend ve nghalin, a license pawh chhuhsak a ni a, a intlansiak leh theih hun tur a hriat loh.

Fenati hian motorcycling a chawlhsan thu a puan ve nghal bawk avang hian a intlansiak leh a rinawm tawh lova, lehkha a zir zawm tur thu kum 22 mi hian a sawi tel bawk.

Fenati hian hetiang thil hi a ching ve fo tawh renga, intlansiak laiin, a bul ami a pet tawh bakah intlansiak hmain a bula mi bike engine a off sak tawh bawk a ni.

Fenati hi Moto2 rider a ni a, Moto2 hi MotoGP hnuai a ni.