Manchester United leh Arsenal te inhnehtawk tum khan Marouane Fellaini chuan inkhelh laklawh laiin Matteo Guendouzi samah a pawt vak mai a, Arsenal chuan free kick an hlawh phah a. Hemi chungchang hian sawi zui a hlawh ta phian.
Old Trafford a inkhelte hi 2-2 in an inhnehtawk a, second half-ah Fellaini hian Guendouzi samah hian a pawt a, referee Andre Marriner chuan Arsenal chu free kick a hlawhtir a, Fellaini hi a hrem hran lo thung.
Guendouzi chuan a hnuah hemi chungchang hi sawi chhuakin, fiamthu pahin Fellaini chu a kap zui a. “Fellaini khan a lu a met tawh sia, ka sam a la sei bik kha min thik a, a sam a sei leh thut thei tawh si lo a, ka sam a awh em avangin ka sam kha a rawn pawt ta chiam mai niin ka hria,” a ti.
2016 khan Fellaini hi Leicester City defender Robert Huth chuan tun tuma thil thleng ang deuh khan a lo ti ve tawh a, hemi tum hian Robert Huth chu match thum chhung khel thei lo turin an hrem thung a. Tun tuma thil thleng chungchangah hian Robert Huth chu Tweeter lamah a lo inrawlh ve vat a, “Ka zirtir tha hle mai,” tiin a lo kap ve vat bawk a ni.
Guendouzi hian Lorient atanga Arsenal a zawm hnuah vawi 12 chu a khel ve ta a, Nilai zana Old Trafford-a an inkhelh khan a che tha thawkhat nia a inhriat thu sawiin a tir lamah che tha vak lo mahse a lungawithlak tawh hlea a hriat thu a sawi.
“Inkhelh apiangin theihtawp ka chhuah thin a, a tir lamah khan ka khel tha vak lo a, mahse minute 20-30 vel bawr kan khelh hnu kha chuan ngai ka awh chho a, ka ziaawm chho tan viau a. Kha inkhelah khan ka che tha thawkhat hlein ka hria a ni,” a ti.