​Fekir lambun tu an awm

22nd July 2019, 05:07PM

Lyon player Nabil Fekir chuan Lyon a la chhuahsan hleithei lova, La Liga club Real Betis-ah a kal tawh mai dawn emaw tih hnuah lo ‘hijack’ tu an awm a, Spain a pan leh dawn lo niin a lang.

Fekir hian Lyon chhuahsan ngei a duh tawh a, Lyon pawh hian a chhuah remti tawh mahse club dang nen inremna an la nei mumal thei lo. Real Betis nen hian sawizawm ber a ni a, kar hmasa lam khan chanchinbu mite chuan Betis leh Fekir -te chu mimal thilah an inrem thuak tawh thu lo tarlang tawh mahse Italian club Napoli an rawn lang leh ta zawk.

Fekir hian Betis lam ni lovin, Serie A club Napoli hi a pan zawk dawn niin tarlan a ni a, tunkar chhung hi chuan engkim tih fel a nih a rinawm a, Fekir hian club thar a neih tawh ngei a rinawm bawk.

Fekir hi nikum nipui lai khan Liverpool-ah a lut tep a, inbe fel hman titih mahse a tawpah rokhawlhna a awm avangin Lyon-ah a cham chhunzawm.

Fekir-a man hi euro maktaduai 20 vel a ni dawn nia tarlan a ni a, kum 26 mi hian Spain lam ni lovin Naples lam a pan zawk dawn niin a lang.

Fekir hi Lyon hotute chuan Spain-ah thlawk luta, Betis nena inbe fel turin phalna pawh pe vek tawh mahse Napoli hi an lo lan leh tak siah chuan season thara Champions League khelh theihna ngei Napoli lam a thlanga, Naples lam panin thlawk zawk tura ngaih a ni.

Betis chuan Fekir hi an player chhuak tura ngaih Giovani Lo Celso thlaktu atana an tih a ni a, Napoli lamin an lo lambun leh tak siah chuan midang an melh a ngai dawn. Lo Celso hian Tottenham a zawm fel thuai a rinawm.

Copyright © inkhel.com 2024. All rights reserved.