05 Jul 2019 07:16

inkhel

Federer leh Nadal te’n world record thar siam an tum

Roger Federer leh Rafael Nadal te chuan kum tharah khian world record siam an tum dawn a. February 2020 ah khian exhibition match an khel dawn a, inkhel entu mipui tam lamah record thar siam hi an rilruk a ni.

Khawvela tennis khelh thiam ber pahnih tia sawi Roger Federer leh Rafael Nadal te chu kum thar tir lamah khian Cape Town-ah an inkhel dawn a, February 7 ah charity match an khel ang a, inkhel entu tam tak hip theih an tum dawn a ni.

Federer leh Nadal te hian singles match an khel phawt ang a, hemi hnuah hian doubles match an khel leh dawn a. Doubles-ah hian Federer chu Microsoft neitupa Bill Gates nen an tang dun ang a, Nadal chu South African comedian Trevor Noah nen an tang dun thung ang.

Nilaithawhtan khan Roger Federer chuan, “Africa-a charity match kan khel thei tur hi a lawmawm ka ti hle a, duhthusam a thleng dik dawn a. Ka nu khuaah kan inkhel dawn a, ka khingpui zinga khauh ber mai, ka thianpa ni bawk Rafa Nadal ka hmachhawn dawn bawk a, hei baka duhthusam hi a awm chuang lo,” a ti.

“Nadal nen hian tennis khelh nuam kan ti dun em em a, he game hi kan ngaihlu hle a. Hemi piah lamah hian naupangte’n zirna tha zawk an neih theihna tur leh an nunkawng tha taka an zawh theihna tura hma lak kawngah kan inlungrual hle a ni,” a ti bawk.

Nadal chuan, “Roger nen hian court chhungah leh pawn lamah pawh hun duhawm tak tak kan lo hmang dun fo tawh a. Cape Town lama a ruala kal ve hi a chakawm tawh hle a, naupangte puala kan inkhel tur hi kawng eng emaw zawng tak chuan a phurawm tawh tak zet a ni,” a ti.

“South Africa-ah hian vawi khat ka kalna tur a ni a, Roger chu min kaihruaitu tur a ni dawn a, a nuam ngawt ang,” a ti bawk.

Roger Federer Foundation chuan he charity match hi an huaihawt dawn a, anni hian Africa vela tanpui ngaite tanpui kawngah hma an lo la teuh tawh a. He charity match hi Cape Town Stadium-ah an khel dawn a ni.

Tennis match entu tam ber record ding lai chu 35,681 niin, 2010 khan Brussels khawpuiah Kim Clijsters leh Serena Williams te inkhel chu hetiang zat mipui hian an en a ni.

Cape Town Stadium-ah hian 2010 FIFA World Cup pawh an lo khel tawh a, a chhungah hian mipui 55,000 chu an leng a, charity match an khelh hunah chuan stadium khat vek tura mipui hip an tum a ni.