Federer leh Djokovic an tang dun dawn

21st September 2018, 10:09PM

Roger Federer leh Novak Djokovic te chu vawi 46 ngawt mai an lo inhmachhawn tawh a, vawiin hian a vawi khatna atan an tang dun dawn.

Laver Cup khelh mekah Federer leh Djokovic te hi an tang dun dawn a, Jack Sock leh Kevin Anderson te tang dun nen United Center-ah an inkhel dawn a. Federer leh Djokovic te hi Team Europe tana khel an ni a, Sock leh Anderson te chu Team World lama khel an ni thung.

Ryder Cup kalphung anga buatsaih Laver Cup-ah hian Top 11 player zinga 7 ngawt mai an tel a, Top 20 huang chhunga awm 10 zet chu an tel a. World No. 1 Rafael Nadal leh No. 4 Juan Martin de Potro te chu inhliam vangin an tel ve thei ta lo a ni.

He tournament buatsaih theih nan hian Federer leh a team te chuan theihtawp an chhuah a. Nikum khan Prague khawpuiah a vawi khatna atan Laver Cup hi an khel tan a, Swiss star hian Team Europe chu a lo chakpui tawh a. Federer leh Nadal te chu hetah hian an tang dun a, an khingpui Jack Sock leh Sam Querrey te tang dun chu 6-4, 1-6, 10-5 in an hneh a ni.

Djokovic leh Federer te inhmachhawn hnuhnun ber chu August 19 khan niin, Cincinnati final-ah an intum a, Djokovic hi 6-4, 6-4 in a chak a, ATP Masters 1000 title 9 a la kim thei chiah a ni.

“He tournament hlutna chu tu te pawh hi min pawt khawm vek a, hetiang hi thil tha tak a ni,” tiin Djokovic chuan a sawi.

Copyright © inkhel.com 2024. All rights reserved.