29 Apr 2020 08:04

inkhel

Federer hi tennis player tha ber a ni: Agassi

Andre Agassi chuan tennis player awm tawh zawng zawngah Roger Federer aia tha an la awm ngai lo niin a sawi.

Roger Federer chu 2005 US Open final-ah a chak a, a vanglaia grand slam title a lak vawi 6-na niin, hemi tuma a hneh hi world number 1 te pawh lo ni tawh Andre Agassi a ni.

Swiss superstar Roger Federer hian tun thlengin grand slam title hi 20 a la tling tawh a, tennis khawvela a elpui pahnih Rafael Nadal leh Novak Djokovic te chuan an um pha teuh tawh hle a. Nadal hian grand slam title 19 a la tawh a, Djokovic pawhin 17 chu a la tawh bawk a ni.

Kum 38-a upa Federer hian inkhelh chawlhsan a hnaih ve tawh tura ngaih a ni a, tunlaiin coronavirus darh mek vangin inkhelh theih a ni lo a, a tum angin a inkhel tam thei tawh dawn lo leh nghal a. Grand slam title a lak hnuhnun ber chu 2018 Australian Open kha a ni.

Kum ruk kal taah khan Andre Agassi chuan Rafael Nadal chu tennis player zinga tha ber a nih thu a lo sawi tawh a. Tun hnaia Bild in an kawmnaah thiam a tih ber hi a thlak leh tawh a, Flushing Meadows-a a lo hneh tawh loh Federer chu a dah chungnung leh ber tawh a ni.

Agassi chuan, “Rinhlelh rual lohin Roger Federer hi tennis player awm tawh zawng zawngah chuan a la tha ber a. Court chhungah Federer anga khingpuite hneh thei hi an awm lo a ni,” a ti.

“Ka that ve lai ber leh a vanglai hi intawng ta ila, ka tan hneh ngaihna a awm ka ring lo a, chuti tak chuan ka dah sang a. 2005 US Open final-ah kan inkhel a, set khat kha ka la ve thei hram a, a bak kha chu tih ngaihna a awm lo,” a ti bawk.

Tun hnuah chuan Agassi hian a nupui lakah pawh set khat lak chu thil harsa a nih tawh thu sawiin, a nupui chu tun hma deuha tennis star thin Steffi Graf kha a ni.

“Kan nupaa kan inkhelh hian Steffi hi a chak zel a. A hriselna a la tha a, kei aiin a la invawng peih zawk bawk a. Zingah hian hma deuhin a tho a, a insawizawi ziah a ni,” tiin Agassi chuan a sawi.