25 Feb 2019 04:59

inkhel

Federer-a’n title 100 lak theih a beisei

Roger Federer chuan title pakhat lak belh leh ngei a tum thu sawiin, a thil tum hi a tihpuitlin hunah chuan a vanglaiin title 100 a la tling thei tawh dawn a ni.

Nikum October hla khan Roger Federer hian Swiss Indoors title a la a, title 99 a lak tlinna chiah niin, hemi hnu hian title dang a lak belh thei ta rih lo a. ATP Tour-ah title 100 la tling thei hi player pakhat chauh a la awm a, Jimmy Connors chuan title 109 a la tling a, ani chiah hi Federer hian a la pha lo a ni.

Swiss superstar Federer hi Dubai Duty Free Tennis Championships ah a tel a, Tour veteran Philipp Kohlschreiber chu a khelh hmasak berah a hmachhawn dawn a ni.

Federer chuan, “Inkhelh apiangin, kar tin theihtawp kan chhuah a, a tha thei ang bera khelh kan tum zel thin. A chang chuan thil hi a kal fuh nghal thlap a, a chang leh kan che fuh hleithei lo viau zel bawk a. Hun a hrang ang bawkin kan chet dan pawh a danglam ve zel bawk a, kan tum urhsun loh vang a ni lem lo,” a ti.

“Nikum October thla atang khan title 99 chungchang kan sawi nawn ta fo mai a, a bak kan sawi belh thei mai rih lo a. Vawi tam tak hlawhtlinna hmel ka lo hmuh tawhna Dubai-ah hian beiseina sang tak nei chungin ka kal a, he lai hmunah ngei hian chanchin thar ka neih theih tawh ka beisei viau a ni,” a ti bawk.

A sawi zelnaah, “Lehlamah chuan title lak hi duh viau mah ila, ka hmachhawn theih turte ka’n en hian a hautak dawn tih a chiang nghal a. Kar eng emaw zat chu ka inkhel tawh lo lehnghal a, theihtawp tak meuh ka chhuah a ngai dawn a ni,” a ti.

2019 chhungin Federer hi inelna pangngaiah vawi khat chiah a la inlan a, Australian Open ah khan telin, round of 16 ah Greek player Stefanos Tsitsipas chu a hneh lo a ni.

“Ka tan chuan tournament fuh lo deuh a ni chuang lo a. Match zawng zawng kha ka khel tha vek a, a thenah khan tihsual ka nei hnem deuh a, point ka hloh nasa a ni ber a. Khelh ka tum anga ka tih loh thin avangin ka khelh dan thlak danglam ka tum phah hran lo a, a ngai angin tha lehzuala khelh ka tum mai thin,” tiin Federer chuan a sawi.

Dubai-a a hmachhawn hmasak ber tur Philipp Kohlschreiber hi Federer nen tun hnaiah an practice dun thin a, anni pahnih hi vawi 13 an intawng tawh a, hengah hian kum 37-a upa Federer hi a la chak vek a, kum 35-a upa Philipp hian chak hmel a la hmu ve lo a. Heng an inkhelh tawhah hian Federer chuan set 3 chiah a la hloh bawk a ni.