30 Jul 2019 05:22

inkhel

Federer-a’n football aia tennis a thlan chhan a sawi

Roger Federer chu kum tam tak chhung tennis avangin khawvel hriatah a lar chho hle a, a hma chuan football a khelh thin thu sawiin, football aia tennis khelh a thlan chhan a sawi chhuak.

Swiss master Roger Federer chuan football leh tennis chu a khelh ve ve thin thu sawiin, a hnuah chuan football lampang thlahin tennis lamah chuan a hun a pe chho ta niin a sawi a. Hetianga duh a thlan fel theih chhan chu tennis a khelh chuan mahniin thu a pawhchah theih zawk vang niin a sawi.

Federer chuan, “Thuneihna neih duh mi ka ni a, chutianga awm theih pawh chu ka tum ber a ni thin a. Tennis kan khelh chuan kan chak emaw, chak lo emaw a ni a, kan chak loh chuan keimahni thiamloh a ni thin,” a ti.

“Football kan khelh erawh chuan chak chang a awm a, chak loh chang a awm bawk a, a chang chuan an inhnehtawk thin bawk a. Kan chak loh chang hi chuan goalkeeper thiam loh hi niin ka hre mai thin a, eng vangin nge striker kha a lo dan chep vat loh tih zawhna te hi a rawn lang vat zel a. A huhoa inkhelh chu nuam ti viau mah ila chhuanlam eng eng emaw hi a tam duh bik riau thin a, thu a rual lo vek zel,” a ti bawk.

A sawi zelnaah, “Hetianga ka buk tawn hnu hian football khelh chuan ngaihdan tam tak a awm thin a, inhnialna leh inrem lohna te a tam thei viauin ka hria a. Chutiang vak ngai loin, mahni duh dan anga awm tam theihna ni zawka ka hriat hnuah tennis khelh zui chu ka thlang ta zawk a ni,” a ti.

Kum 37-a upa Federer chuan, “A chang chuan tennis khelh hi a khawharthlak fu thin a. Kan awm ngawt ngawt a, kan inkhelh hun tur hi kan nghak vang vang fo mai a. He infiamna huangah hian nghah chhuah ngai hi a tam duh angreng hle,” a ti.