Rafael Nadal chuan final-ah Daniil Medvedev a hneh a, Pathianni khan 2019 US Open title a la a. Grand Slam title a lak belh leh takah chuan Roger Federer a nihrual teuh tawh hle a, title pakhat chiahin a la pha lo.
Spanish star Rafael Nadal hian US Open title a lak khan Grand Slam title 19 a la tling ta chiah a. Roger Federer chu Grand Slam title la hnem ber niin, vawi 20 a la tling tawh a. Nadal chuan Swiss star Federer chu a tluk teuh tawh hle a, Federer nihrual thei tur hian Nadal chuan Grand Slam title pakhat chiah lak belh a mamawh tawh a ni.
Nadal hian Federer chiah tluk loh a nei tawh a, Grand Slam title vawi 16 latu Novak Djokovic leh Grand Slam title vawi 14 latu Pete Sampras te chu a hnuaiah hian an awm bawk.
January 31, 2004 hnua Federer leh Nadal te Grand Slam title lak zat inhnaih ber tum a ni a, hemi kumah hian Federer chuan Grand Slam title hi pakhat a la tawh a, Nadal chuan Grand Slam title a la la ve lo thung.
1968 hnuah Rafael Nadal chiah hi Open Era-ah chuan kum 30 tlin hnua major title panga la thei hmasa ber niin, Roger Federer, Novak Djokovic, Rod Laver leh Ken Rosewall te chuan kum 30 an tlin hnuah Grand Slam title 4 theuh an la hlawm a. Nadal hian kum 30 tlin hnuah Grand Slam title chu a zawnin 13 a la tawh a, Open Era-ah chuan hetiang ti rei thei ber a ni.
Pathiannia final an khelh khan Nadal chu kum 33 leh ni 97-a upa a ni a, Open Era-ah chuan US Open title la thei zinga upa ber dawttu a ni chiah a. A upa ber chu 1970 kuma champion, kum 35 leh ni 315-a upa Ken Rosewall a ni.
Open Era-ah chuan Rafael Nadal hi kum 30 tlin hnua US Open title vawi khat aia tam la thei pahnihna a ni a, 2017 kumah khan Nadal chu kum 31 a ni a, US Open title a la a. 1982 leh 1983-a kum 30 tlin hnua US Open title latu Jimmy Connors dawttu chiah a ni.
New York City a title vawi 4 a lak takah chuan Nadal chu Open Era-ah US Open title vawi 4 aia tam la thei pangana a ni a. Roger Federer (5), Pete Sampras (5), Jimmy Connors (5) leh John McEnroe (4) te chu hetiang lo puitlin tawhte an ni.
Nadal hian a vanglaiin kum khat chhunga major title pakhat aia tam a lak theih kum 5 na a ni ta a. 2017 kumah khan pahnih a la a, 2013 kumah pahnih, 2010 kumah pathum lain 2008 kuma pahnih a lo la tawh a. Nadal hi Djokovic leh Emerson te nen an intluk ta chiah a, Federer chuan kum 6 chhung a lo puitlin tawh a ni.
Kum khat chhunga Nadal hian French Open title leh US Open title a lak kawp theih vawi 4-na niin, 2010, 2013 leh 2017 kumah te khan heng title pahnihte hi a lo la ve ve tawh a. Mipa zingah chuan title pahnihte hi la kawp thei hnem ber niin, vawi hnih ve ve lo la tawh Rod Laver leh Ivan Lendl te chu a khum chiang hle.
Rafael Nadal hian singles title 84 a la tling ta chiah a, mipa zingah chuan title lak hnem lamah palina a ni mek a. A chungah hian Jimmy Connors (109), Roger Federer (101) leh Ivan Lendl (94) te chu an awm a, a hnuaiah hian John McEnroe (77) a awm bawk a ni.