Rafael Nadal chuan hlawhtlin chhoh zel a tum rualin, a elpui Roger Federer-a record lo siam tawh khum tum ngawr ngawr a nih loh thu a sawi.

Kum 33-a upa Federer chuan Grand Slam 18 la tawhin, heng zinga 12 chu a lalna hmun an tih mai Roland Garros-a a lak an ni a. Swiss master Roger Federer chuan Grand Slam title 20 lain record ding lai a ni mek a. Nadal hian title lak belh zel a tum thu sawiin, Federer khum tum ngawr ngawr chu a nih loh thu a sawi chhuak.

Nadal chuan, “Roger Federer hian Grand Slam title 20 zet lain record a siam thei a, hei hi a ropui a, min fuihtu atan ka hmang a, amah erna atan ka hmang ngai lo hrim hrim a. Kan thenawmte’n kan in aia lian zawk in an neih avang ngawta lo thinrim chi a ni lo a. Keini aia TV lian emaw, huan lian zawk emaw an neih avanga thinrim chi a ni lo,” a ti.

“Nun kan thlir dan hi a inang lo a, ka sawi ang khi chuan thil thlir reng reng loh tur a ni a. Record siamtu nih chu a chakawm a, chutiang ti thei nih pawh ka duh ngei a, mahse ka tum ber erawh a ni hran lo. Zing takah ka tho chhuak a, training ka nei a, ka inkhel a, Federer khum tum vanga hetianga awm hi ka ni lo thung a. Chutiang rilru pu chunga inkhel chu ka la ni ngai lo,” a ti bawk.

A sawi zelnaah, “Ka chunga thil thleng avang hian vannei ka inti a, ka lawm em em a. Ka hun tawp lampangah Grand Slam title ka lak belh thei a nih chuan a lawmawm hle ang a, Roger ka um pha ve thut thei a, chutiang a thleng a nih ngat chuan awih a harsa zawk viauin ka ring,” a ti.

“Tuna ka duh ber chu ka kawng zawh lai zawh chhunzawm zel hi a ni a, theihtawp ka chhuah zel ang a, hun tha ka neih ang chu bawhpelh loh dan ngaihtuah hram hram ka tum dawn a ni,” tiin Nadal chuan a sawi.

Kumin January thlaa Australian Open final-ah khan Nadal hian Novak Djokovic a hneh lo a, tun season chhungin title a la thei lo hle a, French Open title kha a title lak hmasak ber a ni.