07 Feb 2020 04:40

inkhel

February 24-ah Kobe Bryant an vui dawn

Basketball legend Kobe Bryant vui hun tur an tichiang tawh a, February 24 ah khian Los Angeles khawpuia Staples Center-ah vui a ni ang.

January 26 ah khan Kobe Bryant leh a fanu Gianna bakah mi dang 9 zette chu Calabasas-ah an chuanna helicopter a chetsual avangin an thi a. Vui hun atana February 24 an thlan chhan pawh 24/2 hian awmze hranpa a neih vang niin, No. 24 chu Kobe Bryant khan NBA huanga a hun hnuhnung lampangah khan a ha thin a, No. 2 chu a fanu Gianna khan youth basketball team velah a ha thin bawk a ni.

Kobe Bryant vuina hmun tura an thlan Staples Center hi Los Angeles Clippers NBA team ho hmunpui a ni a, February 24 zanah hian Clippers hian Memphis an mikhual dawn a, hei vang hian Kobe vuina hun chu chhun lamah an hmang dawn a ni.

Hemi ni vek hian NHL team Los Angeles Kings pawhin Staples Center-ah hian game khelh tur an nei a, heti chung hian thuneitute chuan vur chunga basketball khelhna dah chhung chu darkar hnih vel bak a nih dawn loh thu an sawi a ni.

Staples Center hma lampang hi invuina atan an hmang ta fo a, eng thilah emaw pun khawmna atan an hmang nasa viau bawk a. Helai hmunah hian infiamna a nih loh chuan mi 20,000 vel chu an leng thei a. A hmain Michael Jackson leh Nipsey Hussle te pawh an lo vui tawh bawk a ni.

Mumal takin invui hun tur chungchang hi puanzar chu a la ni chiah lo a, dar zat te leh ticket awm zat turte pawh an la sawi lo a. 2009 kumah khan Michael Jackson vuinaah amah ngaisangtute tan ticket 17,000 an pe chhuak a ni.

Bryant kha Lakers tana point score hnem ber niin, NBA all-time list-ah pawh palina niin, a point score zawng zawng chu 33,643 a ni a. US basketball team chu 2008 leh 2012 Olympics ah te khan gold a lakpui a ni.