​FC Venghnuaiin Mizoram Police an lehthal

27th October 2019, 02:10AM

Mizoram Premier League (MPL) Season 8 round 6 Kolasib khelmualah Mizoram Police FC hian Chhinga Veng FC an hneh loh a, October ni 24, Ningani tlai khan round 7 match hnuhnung ber Ar Lammualah kaithar FC Venghnuai 1-0 in anhneh lo leh ta a ni. 

Goal awmchhun hi second half huntawp dawn added time-a lut a ni a, FC Venghnuai tan Police defender H Sanglianmawia chuan an lamah atauh lut a ni. He inkhelah hian FC Venghnuai forward Vanlalthanga chu Man of the match-ah thlan a ni.

FC Venghnuaiin azawna vawihnih an chak loh hnuah hnehna an chang leh a, khelh tawhah point 9 neiin pangana an ni a, Mizoram Police aiin an sang hret. Mizoram Police FC hi azawnin vawithum an chak tawh lo a, Point 9 neiin table-ah parukna an ni mek.

04: 00 PM Mizoram Police FC 0-1FC Venghnuai

(H Sanglianmawia 90+3' (OG)

MoM: Vanlalthanga, FC Venghnuai

Chak mamawh ve ve inkhel an ni bawk a, team pahnih inkhel a hmuhnawm hle. First half-ah goal lut a awm lo a, chungnung zawk awm hleithei lo in an innawr tawn zak zak bawk. Goal hlauhawm vawi khat ve ve an nei a, FC Venghnuai chuan goal hlauhaem nei hmasa zawkin Vanlalthana ball pek luh chu midfielder Lianzuala chuan goal-ah chantir tumin pet mahse Police keeper Muanawma'n a dang hman. Police pawhin goa thunna hun nei ve bawkin mual dinglam sir atanga Lalbiakhlua (Biaktea) ball pek chu forward F Lalrinpuia (Valpuia) goal-ah achantir thei bik lo.

Second half-ah pawh team pahnih te an intluk tawk hle. FC Venghnuai chuan goal hlauhawm nei hmasa zawkin Lianzuala, Vanlalthanga leh bench atanga lut Thangzawmsanga chuan an hun tha an hmang tangkai thei bik lo.

Police pawhin goal thunna hun tha neiin Sangbera'n a hun tha a hloh hnuah Lalbiakhlua (Biaktea) chuan vawihnih a hun tha a hloh zui ve bawk. Goal lut awmlo in khelmual an chhuahsan dawn emaw tih hnu huntawp dawn added time-ah mual dinaglam sir atanga Vanlalthanga ball vawrh luh chu Police defender bench atanga lut H Sanglianmawia chuan an lamah atauh lut hlauh; Police tan an siphurh sutna hun a awm tawh lo. Hun atawp zui nghal a, FC Venghnuai 1-0 in an chak ta a ni.

October ni 29, Thawhlehni tlai dar 4:00-ah FC Venghnuai hian Chhinga Veng FC an hmachhawn ang a, October ni 30, Nilaini zan dar 7:00-ah Mizoram Police FC hian Chanmari FC an hmachhawn ang.

(adsbygoogle = window.adsbygoogle || []).push({});

Copyright © inkhel.com 2024. All rights reserved.